Plaid Cymru i gael gwared ar ‘dreth dementia’

Elin Jones AC
Mae Elin Jones, Gweinidog Iechyd Cysgodol Plaid Cymru, wedi cyfeirio at dystiolaeth gan Age Cymru ar dementia fel tystiolaeth fod angen dybryd am gynlluniau ei phlaid i gael gwared ar rai taliadau gofal cymdeithasol.

Yn ôl Age Cymru, mae 45,000 o bobl yn dioddef o dementia yng Nghymru ar hyn o bryd. Dengys ffigurau Llywodraeth Cymru y gall hyn gynyddu o 35% dros 20 mlynedd.

Yr wythnos hon, cyhoeddodd Plaid Cymru gynlluniau i gael gwared ar y rhaniad hanesyddol rhwng gofal iechyd a chymdeithasol, sy’n golygu fod nifer o bobl oedrannus a dioddefwyr o dementia yn gorfod talu oherwydd fod eu gofal yn cael ei ddiffinio yn ‘gymdeithasol’ yn hytrach na dod o dan y Gwasanaeth Iechyd.

Dywedodd Elin Jones, AC Ceredigion a Gweinidog Iechyd Cysgodol Plaid Cymru: “Sicrhau tegwch a chyfartaledd yw pwrpas y cynlluniau a gyhoeddais i yr wythnos hon. Ar hyn o bryd, gall pobl sydd â dementia ddisgwyl mynd trwy brawf modd ac yn aml byddant yn talu am eu gofal.

“Mae’r dreth dementia hon yn effeithio ar 45,000 o bobl yng Nghymru; ffigwr sydd ar gynnydd. Rwy’n credu fod hyn yn annerbyniol. Mae cywiro’r anhegwch hanesyddol yma yn ganolog i gynlluniau Plaid Cymru i integreiddio gofal iechyd a chymdeithasol, a gwaredu taliadau gofal yr henoed.”