RSS

Golwg360

MwyCau 

Teithwyr bws yn dychwelyd wedi damwain yn y Swistir

Medi 7, 2015 12:16 Diweddarwyd am 12:20



Un o fysys Edwards Coaches
Mae disgwyl i rai o’r teithwyr fu mewn damwain bws yn y Swistir ddydd Gwener ddychwelyd i Gymru’r prynhawn yma.

Mae 2 o’r gyrwyr a 4 teithiwr arall wedi gorfod aros yn y Swistir am gyfnod hwy oherwydd anafiadau mwy difrifol.

Fe ddywedodd Jason Edwards, Cyfarwyddwr Masnachol cwmni bysiau Edwards Coaches, nad oedd yr anafiadau “yn rhy ddifrifol”, ond bod rhai wedi torri esgyrn.

‘Lori’n taro’r bws’

Roedd y bws gan gwmni bysiau Edwards o ardal Pontypridd yn cludo 39 o bobol yn ôl i dde Cymru’r diwrnod hwnnw.

Roedden nhw wedi treulio cyfnod ar wyliau yn yr Eidal, pan fu lori mewn gwrthdrawiad a’r bws wrth iddyn nhw gael eu dal mewn traffig yn ninas Zurich, y Swistir.

Dywedodd Jason Edwards fod y teithwyr yn teithio ar fws newydd Mercedes Turismo, ac roedd e’n falch o hynny, am fod gan y bws hwnnw lefelau uchel o ddiogelwch.

“Petaen nhw wedi bod yn teithio ar fws arall, gallen ni fod yn delio â sefyllfa lawer gwaeth,” meddai’r Cyfarwyddwr Masnachol.

Fe wnaeth y cwmni fuddsoddi £2.5m y llynedd ar fysiau newydd ac, yn ôl Jason Edwards, “fedrwch chi ddim rhoi pris ar ddiogelwch”.

Cysylltodd Edwards Coaches â theulu’r teithwyr yn syth wedi’r ddamwain, “ond oherwydd cysylltiadau ffôn gwan, mae hi wedi bod yn anodd cael gafael arnynt”, meddai Jason Edwards.

Fe ddywedodd Heddlu Lucerne fod pedwar lori wedi bod ynghlwm â’r ddamwain i gyd, a bod yr ymchwiliadau’n parhau.

Ychwanegu Sylw

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.


Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.


Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.


Gofynwn yn garedig i bawb ddarllen canllawiau ‘Cyfrannu i elfennau rhyngweithiol Golwg360’ yn ofalus cyn gadael sylwadau ar y gwasanaeth.


Nodi Camddefnydd
Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.