Llafur ‘angen targedu’r canol’

 


Carwyn Jones yn siarad ar faes yr Eisteddfod ym Meifod
Mae angen i’r Blaid Lafur “dargedu pobl sydd yn y canol” os ydyn nhw am ennill yr etholiad cyffredinol nesaf yn San Steffan, yn ôl Prif Weinidog Cymru Carwyn Jones.

Mewn cyfweliad â Golwg360 dywedodd arweinydd Llafur Cymru na fydd yn datgelu’n gyhoeddus pwy fydd e’n ei gefnogi yn y ras am arweinyddiaeth Llafur.

Awgrymodd fodd bynnag nad oedd yn debygol o bleidleisio dros Jeremy Corbyn, yr ymgeisydd sydd yn cael ei ystyried fwyaf adain chwith.

Wrth drafod etholiadau’r Cynulliad yn 2016 dywedodd Carwyn Jones y byddai’n “od” gweld plaid “Saesnigaidd” fel UKIP yn ennill tir, gan amddiffyn hefyd benderfyniad diweddar Llywodraeth Cymru ar dargedau ambiwlans.

Aberthu egwyddorion?

Dros y dyddiau diwethaf mae Jeremy Corbyn wedi symud i flaen y ras ar gyfer arweinyddiaeth y Blaid Lafur, gyda sawl pôl piniwn yn awgrymu y gallai ennill.

Mynnodd Carwyn Jones ei fod “heb wneud penderfyniad eto” ynglŷn â phwy i gefnogi, gan awgrymu’n gryf fodd bynnag na fyddai Corbyn yn ddewis doeth i’r blaid.

“Pwy bynnag sy’n ennill [yr arweinyddiaeth], does dim modd i ni ennill oni bai ein bod ni’n targedu pobl sydd yn y canol, achos does dim digon o bobl i’r chwith o’r canol i ennill etholiad,” meddai Prif Weinidog Cymru.

“I fi, dw i moyn sicrhau bod ni wir yn blaid sy’n ennill etholiadau ar y lefel Brydeinig, ac nid yn cael ei droi mewn i grŵp academaidd sydd yn bur ei egwyddorion ond ffaelu ennill etholiad.”

Plaid ‘Saesnigaidd’

Yr wythnos diwethaf fe awgrymodd arweinydd UKIP Nigel Farage y gallai ei blaid anelu i fod yn brif wrthblaid ym Mae Caerdydd ar ôl etholiadau’r Cynulliad y flwyddyn nesaf.

Mynnodd Carwyn Jones fod cefnogaeth y blaid wedi cwympo ers mis Mai, fodd bynnag, gan gwestiynu hefyd beth fyddai eu neges yn yr etholiad yn 2016.

“Y drefn yw eu bod nhw wedi colli pleidleisiau dros y misoedd diwethaf ers yr etholiad cyffredinol, does neb yn gwybod beth fydd eu neges nhw mewn etholiad Cynulliad,” meddai Carwyn Jones.

“Ar un adeg roedden nhw yn erbyn y Cynulliad, yn erbyn y Gymraeg, yn erbyn unrhyw beth i’w wneud â Chymru.

“Bydde fe’n  beth od dros ben gweld plaid mor Saesnigaidd ei hagwedd yn cael rhyw fath o gryfder yn y Cynulliad.”

Dim cymharu ar iechyd

Ar ôl i Lywodraeth Cymru gyhoeddi’n ddiweddar eu bod nhw’n bwriadu sgrapio targedau ar gyfer amseroedd ymateb ambiwlans, mae’r gwrthbleidiau yn y Cynulliad wedi awgrymu bod y gyfundrefn Lafur yn ceisio claddu newyddion drwg.

Mae’r targed at gyfer ymatebion o fewn wyth munud wedi cael ei fethu’n gyson dros y blynyddoedd diwethaf, gan arwain at gyhuddiad bod y targedau’n cael eu sgrapio cyn etholiadau’r Cynulliad.

Mynnodd Carwyn Jones nad oedd hynny’n wir gan ddweud eu bod yn cysoni’r mesuriadau â Lloegr.

“Mae’n gwmws beth sy’n digwydd yn Lloegr. Os ydyn ni am gael ei mesur mewn ffordd deg mae’n bwysig bod pobl yn medru mesur ni a chael yr un ffordd o wneud pethau,” mynnodd y Prif Weinidog.

Cyfaddefodd fodd bynnag ei fod o’r farn na ddylai ystadegau’r ddwy wlad gael eu cymharu.

“Dyle hwnna ddim gorfod digwydd, ond i fod yn onest mae’n digwydd, ni gyd yn gwybod hynny,” ychwanegodd.

“Felly os yw e’n mynd i ddigwydd, man a man ein bod ni’n cael yr un strwythur.”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn