Dathlu ym Mhatagonia
Mae Gŵyl y Glaniad yn cael ei gynnal heddiw ym Mhorth Madryn i nodi union gant a hanner o flynyddoedd ers i’r Cymry cyntaf lanio ym Mhatagonia ar 28 Gorffennaf 1865.
Bydd trigolion Patagonia yn ail-greu’r diwrnod hanesyddol drwy hwylio cychod, codi baneri a chynnal gweithgareddau ym mae Porth Madryn.
Byddan nhw’n cloi’r ŵyl gyda Chymanfa Ganu i ddathlu’r canmlwyddiant a hanner, ac mae digwyddiadau wedi’u trefnu yng Nghymru hefyd.
‘Cyngerdd bythgofiadwy’
Neithiwr, bu sioe fawreddog ym Mhorth Madryn i ail-greu’r glaniad, a chafwyd perfformiadau o emynau fel Calon Lân ac Ar lan y môr.
Roedd Prif Weinidog Cymru, Carwyn Jones, yn bresennol yn y gyngerdd, ac fe ddywedodd ei fod “yn gyngerdd bythgofiadwy i ddathlu’r glaniad”.
Mae’r Prif Weinidog yn ymweld â rhannau o Batagonia ar hyn o bryd gan ymuno yn nigwyddiadau’r dathlu.
Nid oedd Arlywydd yr Ariannin, Christina Fernandez de Kirchner, yn medru bod yn bresennol yn y gyngerdd, er iddi gael gwahoddiad, oherwydd salwch.
Cymru
Mae digwyddiadau yn cael eu cynnal yng Nghymru hefyd i nodi’r achlysur, gyda chymdeithas Aberystwyth-Esquel wedi paratoi arlwy yn y dref heddiw.
Bydd perfformiadau cerddorol byw, dawnsio tango a darlleniadau o farddoniaeth gan Karen Owen a Mererid Hopwood, o’u cyfrol newydd Glaniad, yn cael eu cynnal yn ystod y dydd.
Gyda’r Eisteddfod Genedlaethol ar y gorwel, mae bwrlwm y dathlu yn parhau gyda pherfformiad o gynhyrchiad Theatr yr urdd, Mimosa, yn cael ei arddangos.
Mae Cymdeithas Cymru-Ariannin wedi trefnu cyfarfodydd yn eu pabell, a bydd trafodaethau, argraffiadau ac atgofion yn cael eu rhannu ar hyd a lled y maes yn ystod yr wythnos.