RSS

Golwg360

MwyCau 

Pleidlais tanwydd ffosil – ‘cyfle hanesyddol i Gymru’

Ebrill 22, 2015 14:45


Fe all Cymru ddod y wlad gyntaf yn y byd i atal unrhyw gloddio am danwydd ffosil, petai’r Cynulliad yn pleidleisio o blaid moratoriwm ar gloddio am lo brig heddiw.

Mae Cyfarwyddwr Cyfeillion y Ddaear Cymru Gareth Clubb wedi dweud bod y bleidlais “o bwys rhyngwladol enfawr” ac am effeithio ar y cenedlaethau i ddod.

Ym mis Chwefror eleni, fe wnaeth Llywodraeth Cymru gyhoeddi moratoriwm ar ffracio.

Heddiw, fe fydd cynnig trawsbleidiol gan Bethan Jenkins o Blaid Cymru, William Graham o’r Ceidwadwyr, Lynne Neagle o Lafur a William Powell o’r Democratiaid Rhyddfrydol yn cael ei drafod yn y Cynulliad sy’n galw am ohirio cyfraith ar gloddio am lo brig.

“Gyda’r moratoriwm presennol ar ffracio a marwolaeth y diwydiant cloddio glo, mae’n golygu bod gan Gymru gyfle i agor pennod newydd yn ei hanes.

“Mae’n golygu y gall Cymru fod y wlad gyntaf yn y byd sydd â chronfa sylweddol o danwydd ffosil i beidio eu defnyddio,” meddai Gareth Clubb mewn blog ar clickonwales.

Difrod

Dywedodd Gareth Clubb bod tanwydd ffosil yn achosi “difrod difesur” i ddynoliaeth ac i holl fywyd ar y ddaear:

“Mae’n achosi llygredd dwr ac awyr wrth i sylffwr a’r cemegau mwyaf gwenwynig gael eu gollwng i’r aer. Mae hefyd yn achosi problemau iechyd a marwolaethau cynnar.

“Dyma pam fod y penderfyniad hwn, ar adeg lle mae’r byd yn galw am arweinyddiaeth, mor bwysig.

“Dyma ein cyfle. Ein cyfle i wneud i enw ein gwlad – Cymru – atseinio drwy’r canrifoedd”.

Mae llythyr gan arbenigwyr ac ymgyrchwyr amgylcheddol – fel Naomi Klein, Bill McKibben a Nnimmo Bassey – wedi cael ei gyhoeddi yn y Western Mail heddiw hefyd, sy’n galw ar ACau i gefnogi’r moratoriwm.

Ychwanegu Sylw

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.


Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.


Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.


Gofynwn yn garedig i bawb ddarllen canllawiau ‘Cyfrannu i elfennau rhyngweithiol Golwg360’ yn ofalus cyn gadael sylwadau ar y gwasanaeth.


Nodi Camddefnydd
Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.