Kate Roberts: Llwyfannu dwy ddrama newydd

 


Kate Roberts
Yn ystod wythnos Eisteddfod Dinbych a’r Cylch, bydd dwy ddrama newydd yn cael eu llwyfannu gan Theatr Bara Caws.

Bydd ‘Cyfaill’ gan Francesca Rhydderch ac addasiad llwyfan o ‘Te yn y Grug’ gan Manon Wyn Williams yn cael eu perfformio yn Theatr Twm o’r Nant, Dinbych, o nos Fawrth 6 Awst hyd at nos Wener, 9 Awst am 7.30pm.

‘Cyfaill’

Mae ‘Cyfaill’ gan Francesca Rhydderch yn archwilio un o’r cyfnodau mwyaf cythryblus ym mywyd Kate Roberts, pan fu farw ei gŵr, Morris Williams, o alcoholiaeth.

Yn ôl Francesca Rhydderch hoffai Kate Roberts ddweud fod ei bywyd yn darllen fel nofel, gan iddi ddioddef profedigaethau pan yn wraig ifanc wrth iddi golli ei brawd yn y Rhyfel Byd Cyntaf, ac yna’i gŵr ym 1946.

Dywedodd Francesca Rhydderch: “Wrth ysgrifennu drama sy’n mynd i’r afael â galar Kate ar ôl colli Morris Williams, fy mwriad oedd dangos gallu Kate i lunio gwaith artistig o ddeunydd crai ei bywyd.”

‘Te yn y grug’

Awdures ifanc o Ynys Môn, Manon Wyn Williams, sydd wedi cael y cyfrifoldeb o addasu ‘Te yn y Grug’ ar gyfer y llwyfan ac mae hi’n falch iawn o’r cyfle er gwaethaf ysgwyddo’r baich o drosi gwaith mor adnabyddus a phoblogaidd.

“Gan fod ‘Te yn y Grug’ yn destun mor gyfarwydd i gynulleidfaoedd, meddai Manon Wyn Williams, “roedd yn bwysig glynu’n agos at y cymeriadau, y straeon a’r ddeialog wreiddiol, ac yn arbennig felly i arddel ieithwedd, idiomau a geirfa Kate Roberts sydd mor nodweddiadol ohoni fel awdures. Dyma gyfrol sydd mor agos at ein calon fel cenedl ac a fu’n rhan o blentyndod cynifer ohonom”.

Betsan Llwyd yw cyfarwyddwr artistig Theatr Bara Caws a hi gyfarwyddodd y ddwy ddrama. Mae hi’n o’r farn mai Dinbych yw’r lle i lwyfannu’r dramâu hyn er bod llawer efallai yn cysylltu Kate Roberts â Rhosgadfan yng Ngwynedd.

Ei chyfnod mwyaf toreithiog yn Ninbych

“Bywyd a gwaith pwy arall a fynnai sylw, â’r Eisteddfod Genedlaethol yn Ninbych, a ninnau’n perfformio yn Theatr Twm o’r Nant, ond Kate Roberts,” meddai Betsan Llwyd.

“Ac er nad oedd cyfnod yr awdures yn y dref yn fêl i gyd, y blynyddoedd yn Ninbych a esgorodd ar ei chyfnod creadigol mwyaf toreithiog. Mae wedi bod yn hynod o ddifyr gweithio ar ddrama ffuglenol sydd wedi ei seilio ar ffeithiau, ochr yn ochr ag addasiad o un o’i llyfrau mwyaf poblogaidd.”

Yn ogystal â’r dramâu, bydd John Ogwen a Maureen Rhys yn cyflwyno’u rhaglen arbennig, ‘Annwyl Kate, Annwyl Saunders’ yn y Babell Lên am 12.45 y prynhawn, sef cipolwg ar gyfnod maith o lythyru rhwng dau o brif lenorion Cymru.

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd