Victoria Shervington-Jones, Ffermwraig y Flwyddyn
Mae Undeb Cenedlaethol yr Amaethwyr (NFU Cymru) wedi cyhoeddi enw enillydd cystadleuaeth ‘Ffermwraig y Flwyddyn 2017’.
Mae Victoria Shervington-Jones yn dod o Lansanffraid Gwynllŵg, ger Casnewydd ac yn berchen ar gwmni o’r enw ‘Country Fresh Eggs’ sydd yn gwerthu wyau maes.
Mae’r ffermwraig yn ymweld ag ysgolion er mwyn dysgu plant ynglŷn â ffermio, yn cyfrannu at weithgareddau Clwb Ffermwyr Ifanc Maendy, ac yn aelod o Bwyllgor Sioe Morgannwg.
Hon yw 21ain flwyddyn y gystadleuaeth sydd yn dathlu cyfraniad menywod yn niwydiant amaethyddiaeth ac sy’n cael ei chynnal ar y cyd â Chymdeithas Adeiladu Principality.
“Esiampl wych i fenywod”
“Rydw i’n falch iawn i gyhoeddi mai Victoria yw Ffermwraig y Flwyddyn yng Nghymru,” meddai Is-Lywydd NFU Cymru, John Davies.
“Mae hi’n esiampl wych i fenywod sydd yn ffermio ac mae hi’n ymdrechu 110% a phopeth.
“Mae’n glir bod Victoria o hyd yn ceisio dod o hyd i ffyrdd o wella ei busnes er mwyn ei wneud yn gynaliadwy yn bell i’r dyfodol.
“Mi wnaeth Victoria ymateb yn gyflym i’r helynt â ffliw adar… mi wnaeth hi dawelu meddyliau ei chwsmeriaid trwy ddosbarthu pamffledi.”