RSS

Golwg360

MwyCau 

Ffermwyr yn pryderu am ragor o hawliau crwydro

Chwefror 15, 2017 08:52


Gat mochyn ar lwybr cyhoeddus (Oliver White CCA2.0)
Mae un o undebau amaethyddol Cymru wedi mynegi pryder am gynllun i roi mwy o hawliau i bobol grwydro cefn gwlad.

Yn ôl NFU Cymru, ffermwyr sy’n debyg o ddiodde’ os yw’r cynigion newydd gan yr Ysgrifennydd Amgylchedd a Materion Gwledig yn cael eu derbyn.

Fe fyddai rhagor o fynediad i gefn gwlad yn cynyddu’r cyfrifoldebau ar amaethwyr, meddai Hedd Pugh, Cadeirydd Materion Gwledig NFU Cymru.

Y cynigion

Ddydd Llun fe gyhoeddodd Llywodraeth eu bod am wella’r cyfleoedd i bobol fwynhau’r awyr agored a chymryd rhan mewn gweithgareddau hamdden.

Yn ôl yr Ysgrifennydd  Amgylchedd a Materion Gwledig, Lesley Griffiths, mae angen symleiddio’r modd o gofnodi mynediad i’r cyhoedd, sicrhau cysondeb i gymryd rhan mewn gweithgareddau a gwella fforymau cynghori ar hawliau y cyhoedd.

Ond mae hyn wedi codi pryderon ymysg ffermwyr gydag NFU Cymru yn dweud na ddylai’r newidiadau fod ar draul costau a beichiau ffermwyr a’r gymuned wledig.

‘Dim tystiolaeth’

Roedd yr undeb yn cydnabod fod mynediad i gefn gwlad yn bwysig i wella iechyd y cyhoedd, yn ôl Hedd Pugh, ond nid cynyddu’r hawl i grwydro oedd yr ateb.

“Yn wir, mae tystiolaeth yn dangos, er gwaethaf cynnydd cymaint â theirgwaith mewn mynediad i dir ers datganoli, does dim newid wedi bod yn y nifer o ddefnyddwyr,” meddai.

Dywedodd y dylai’r Llywodraeth ganolbwyntio ar foderneiddio’r llwybrau a’r hawliau presennol a’I gwneud yn llai costus i gynnal y drefn.

Mae Llywodraeth Cymru wedi cynnal ymgynghoriad ar y mater gyda 5,800 o ymatebion, a dywedodd Lesley Griffith ei bod am ymgynghori ymhellach ynglŷn â sut i ddatblygu’r cyfreithiau presennol.

  • Mae gan Gymru 16,000 milltir o lwybrau cyhoeddus, 3,000 milltir o lwybrau ceffylau, 1,200 milltir o rwydwaith seiclo a 460,000 hectar o dir agored lle mae rhyddid i grwydro.

Ychwanegu Sylw

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.


Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.


Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.


Gofynwn yn garedig i bawb ddarllen canllawiau ‘Cyfrannu i elfennau rhyngweithiol Golwg360’ yn ofalus cyn gadael sylwadau ar y gwasanaeth.


Nodi Camddefnydd
Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.