RSS

Golwg360

MwyCau 

90% o ffermwyr Cymru i dderbyn taliadau’n brydlon

Rhagfyr 1, 2016 10:30 Diweddarwyd am 12:14


Lesley Griffiths, Ysgrifennydd Amgychedd a Materion Gwledig
Mae ffenestr daliadau’r Cynllun Taliad Sylfaenol yn agor heddiw (Rhagfyr 1) ac mae Llywodraeth Cymru wedi ymrwymo y bydd bron i 90% o ffermwyr Cymru yn derbyn eu cymorthdaliadau yn ystod y dydd.

Ar ei hymweliad â’r Ffair Aeaf ddechrau’r wythnos, dywedodd yr Ysgrifennydd Amgylchedd a Materion Gwledig, Lesley Griffiths, y byddai £173 miliwn yn cael ei dalu i gyfrifon banc 13,176 o ffermwyr Cymru ar ddiwrnod cynta’r ffenestr dalu.

Esboniodd fod prydlondeb y broses yn deillio o ddatblygiadau ar-lein y system geisiadau.

“Mae’r perfformiad rhagorol hwn wedi digwydd yn rhannol oherwydd ein bod bellach yn prosesu ceisiadau ar-lein, sydd wedi lleihau biwrocratiaeth, ac wedi  caniatáu i geisiadau gael eu prosesu yn gyflym ac yn effeithiol,” meddai Lesley Griffiths.

“Ni yw’r unig wlad sy’n cynnig dull digidol cyflawn o brosesu’r ceisiadau hyn.”

Beth fydd yn digwydd ar ôl 2020?

Mae ffrae wedi codi’r wythnos hon hefyd ynglŷn â phwy ddylai gynllunio a gweithredu cynllun cyfatebol unwaith y bydd Prydain yn gadael yr Undeb Ewropeaidd.

Ar hyn o bryd, mae’r Trysorlys wedi cadarnhau y bydd y cynllun yn cael ei ariannu tan 2020, ond does dim sicrwydd beth fydd yn digwydd wedi hynny.

Yn ôl Andrew RT Davies, Llywodraeth Prydain ddylai gymryd y cyfrifoldeb o lunio cynllun cyfatebol i’r Polisi Amaeth Cyffredin wrth iddo honni fod gan ffermwyr Cymru “fwy o hyder” ynddyn nhw na Llywodraeth Cymru.

Ond anghytuno’r oedd Simon Thomas, AC Plaid Cymru a llefarydd ar faterion gwledig, wrth iddo gyhuddo arweinydd y Ceidwadwyr Cymreig o geisio “canoli pwerau yn San Steffan”.

Mewn ymateb dywedodd Lesley Griffiths ei bod wedi ymgynghori â ffermwyr a chynrychiolwyr o’r economi wledig ac wedi gweld parodrwydd “i ddatblygu polisïau amaeth unigryw i Gymru, yn ymateb i anghenion unigryw a diddordebau’r cymunedau ffermio yng Nghymru.”

Ychwanegu Sylw

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.


Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.


Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.


Gofynwn yn garedig i bawb ddarllen canllawiau ‘Cyfrannu i elfennau rhyngweithiol Golwg360’ yn ofalus cyn gadael sylwadau ar y gwasanaeth.


Nodi Camddefnydd
Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.