RSS

Golwg360

MwyCau 

Asiantaeth symud gwartheg wedi methu ag ateb 92.5% o alwadau Cymraeg

Hydref 6, 2016 09:24


Mae Comisiynydd y Gymraeg wedi cyhoeddi adroddiad sy’n dweud bod un o asiantaethau amaethyddol gwledydd Prydain wedi torri ei gynllun iaith ei hun.

Yn ôl ymchwiliad Meri Huws, fe fethodd y Gwasanaeth Symud Gwartheg Prydain ateb 92.5% o alwadau i’w linell ffôn Gymraeg yn yr un iaith dros gyfnod o chwe mis.

Yn ôl yr Asiantaeth roedd eu cwsmeriaid yn cael cynnig galwad yn ôl gan siaradwr Cymraeg neu yn cael cynnig parhau â’r alwad yn Saesneg.

Ond mae’r Comisiynydd yn dweud nad yw un o’r ddau opsiwn yn cyd-fynd ag “ymrwymiad statudol y sefydliad” i ddarparu gwasanaeth ffôn yn Gymraeg ac yn Saesneg.

Mae angen i’r asiantaeth hefyd gyhoeddi cynllun iaith Gymraeg cyfredol ar ei gwefan.

Cadw llygad am flwyddyn

Mae’r adroddiad yn nodi bod angen i’r Asiantaeth hysbysu’r Comisiynydd am flwyddyn o nifer y galwadau i’r llinell ffôn Gymraeg sy’n cael eu hateb yn y Gymraeg.

Fe ddechreuodd Comisiynydd y Gymraeg ymchwiliad i’r Asiantaeth Taliadau Gwledig yn dilyn cwyn gan aelod o’r cyhoedd.

“Os yw aelodau’r cyhoedd yn teimlo eu bod wedi cael gwasanaeth anfoddhaol am eu bod wedi ceisio’r gwasanaeth hwnnw yn Gymraeg, mae ganddynt hawl i ddod ataf i gwyno, a dyna ddigwyddodd yn yr achos hwn,” meddai Meri Huws.

“Fe ystyriais gŵyn yr unigolyn a phenderfynu defnyddio pwerau statudol er mwyn cynnal ymchwiliad i ganfod a fu methiant i lynu at ddyletswyddau iaith.”

Mae golwg360 wedi ceisio cysylltu â’r Asiantaeth Taliadau Gwledig.

Ychwanegu Sylw

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.


Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.


Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.


Gofynwn yn garedig i bawb ddarllen canllawiau ‘Cyfrannu i elfennau rhyngweithiol Golwg360’ yn ofalus cyn gadael sylwadau ar y gwasanaeth.


Nodi Camddefnydd
Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.