RSS

Golwg360

MwyCau 

Taclo beicwyr môr ‘anghyfrifol’ sy’n poeni bywyd gwyllt

Mehefin 20, 2016 09:43 Diweddarwyd am 14:28


Mae ymgyrch newydd yn cael ei lansio heddiw i daclo beicwyr môr (jet skis) sy’n aflonyddu bywyd gwyllt y môr oddi ar arfordir gogledd Cymru.

Bwriad Ymgyrch Neifion Heddlu’r Gogledd yw ei gwneud yn haws i bobol roi gwybod i’r awdurdodau os ydyn nhw’n amau bod unrhyw aflonyddu o’r fath yn digwydd.

Mae’r ymgyrch yn cael ei lansio ym Mhen Llŷn, yn dilyn adroddiadau bod beicwyr môr wedi bod yn poeni dolffiniaid oddi ar arfordir Abersoch a Thywyn ddechrau’r flwyddyn.

Uned Troseddau Cefn Gwlad Heddlu Gogledd Cymru fydd yn arwain yr ymgyrch, ac mae wedi’i gefnogi gan yr Aelod Seneddol lleol, Liz Saville Roberts.

“Heddiw rydym yn lansio Ymgyrch Neifion i hyrwyddo ymddygiad cyfrifol ar ein harfordir. Bydd Ymgyrch Neifion yn weithredol trwy gydol yr haf,” meddai’r Rhingyll Rob Taylor.

“Mae arfordir gogledd Cymru yn cynnal cynefinoedd a bywyd gwyllt pwysig, felly rydym yn annog perchnogion cychod a beicwyr môr i barchu’r amgylchedd yma bob tro.”

“Angen dwyn pobol i gyfrif”

Yn ôl Liz Saville Roberts, mae pobol yn barod i roi gwybod i’r heddlu pan fydd achosion o’r fath yn digwydd ond bod “peth dryswch ynglŷn â sut a phwy i’w hysbysu.”

“Mae’r rhan fwyaf o ddefnyddwyr beiciau môr a chychod yn cydymffurfio â rheolau’r Côd Ymddygiad Morwrol ond mae’r rhai sy’n fwriadol aflonyddu a phoeni bywyd gwyllt y môr angen eu dwyn i gyfrif,” meddai.

“Yn ddiweddar mae sawl adroddiad wedi bod o ddefnyddwyr beiciau môr yn aflonyddu dolffiniaid oddi ar arfordir gogledd Cymru. Yr hyn sy’n amlwg yw bod y cyhoedd yn barod iawn i adrodd hyn i’r awdurdodau ond mae peth dryswch ynglŷn â sut a phwy i’w hysbysu.”

“Bwriad yr ymgyrch yma yw hyrwyddo defnydd cyfrifol o gychod a beiciau môr a darparu’r cyhoedd â’r wybodaeth briodol er mwyn hysbysu’r awdurdodau o unrhyw weithred anghyfreithlon.”

Ychwanegu Sylw

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.


Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.


Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.


Gofynwn yn garedig i bawb ddarllen canllawiau ‘Cyfrannu i elfennau rhyngweithiol Golwg360’ yn ofalus cyn gadael sylwadau ar y gwasanaeth.


Nodi Camddefnydd
Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.