Trefnwyr y Brifwyl yn cynnig cynghorion i fusnesau Dyffryn Conwy

Diweddarwyd  
Gorsedd Cernyw

Gorsedd Cernyw

Llun: Lowri Fron / golwg360

“Mae’n bwysig bod y sector twristiaeth leol yn barod i elwa,” meddai trefnwyr yr Eisteddfod Genedlaethol wrth iddyn nhw gynnig cynghorion i fusnesau a sefydliadau yn Nyffryn Conwy cyn mis Awst.

Bydd yr Eisteddfod Genedlaethol yn ymweld ag ardal Llanrwst eleni, a hynny am y tro cyntaf ers 1989.

Mae’r trefnwyr yn disgwyl y bydd tua 150,000 o bobol yn ymweld â’r ardal ym mis Awst, gan greu effaith economaidd o £6-8m yn ystod wythnos y Brifwyl.

Yn rhan o’r paratoadau mae cyfarfod arbennig yng Nghonwy lle bydd modd i fusnesau a sefydliadau  holi’r trefnwyr am wahanol syniadau a gofyn am gyngor ynglŷn â sut i ddenu eisteddfodwyr i wahanol rannau o’r sir.

Bydd y cyfarfod hefyd yn pwysleisio ar bwysigrwydd gwasanaethau Cymraeg, meddai’r trefnwyr ymhellach.

“Cydweithio”

“Mae ymchwil yr Eisteddfod wedi dangos bod ein hymwelwyr, ac yn arbennig ein carafanwyr, yn mwynhau crwydro’r ardal leol yn ystod yr wythnos yn ogystal â mynd i’r maes,” meddai Alwyn Roberts, Pennaeth Gweithredu Cymunedol yr Eisteddfod.

“Felly mae’n bwysig bod y sector twristiaeth leol yn barod i elwa o hyn a’n bod yn cydweithio er mwyn sicrhau bod y cynnyrch a’r cyfleoedd sydd ar gael yn taro deuddeg.

“Mae defnyddio’r Gymraeg yn rhan bwysig o apelio at ein hymwelwyr. Mae Eisteddfodwyr yn mwynhau ymweld â rhan wahanol o Gymru yn flynyddol, a chael blas ar yr iaith yn yr ardal.

“O gynnig gwasanaeth cyflawn drwy gyfrwng y Gymraeg i gyfarch ac annog staff a gwirfoddolwyr i gael blas ar yr iaith, mae hyn yn fodd i apelio at ymwelwyr o bob rhan o’r wlad.

“Bydd y sesiwn yn cynnig syniadau, cyngor a chymorth ar sut i ddefnyddio’r iaith i gyrraedd ein hymwelwyr.”

Bydd y cyflwyniad yn cael ei gynnal yn Neuadd Caer Rhun, Conwy, ar Fawrth 27.

 

Arian a Busnes

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Anrhydeddau Gorsedd y Beirdd 2019