Mae’r prif weinidog Mark Drakeford wedi dymuno “Eid Mubarak” i Fwslimiaid Cymru.
Eid-al-Fitr yw’r diwedd swyddogol ar yr ymprydio sy’n digwydd yn ystod mis sanctaidd Ramadan.
Mae’r cyfnod wedi bod yn un anodd a gwahanol iawn i’r arfer yn sgil cyfyngiadau’r coronafeirws eleni, ond mae’r prif weinidog wedi canmol “gwytnwch a chreadigrwydd” y gymuned Foslemaidd yng Nghymru.
Daw ei neges mewn fideo ar ei dudalen Twitter.
“Hoffwn ddanfon fy nymuniadau gorau at bob Mwslim yng Nghymru sy’n nodi diwedd y mis sanctaidd Ramadan,” meddai.
“Mae cryfder a chreadigrwydd ein cymunedau Mwslimaidd wedi fy llenwi â gobaith.
“Nid yw’r gwerthoedd allweddol o elusen a thosturi yn ystod Ramadan wedi methu yn ystod yr amser anodd hwn.”
‘Profiad gwahanol iawn’
“Mae llawer ohonoch wedi canolbwyntio ar helpu y rhain sydd yn llai ffodus, a gwn fod llawer ohonoch wedi defnyddio technoleg newydd i uno cymdogion, cymunedau a theuluoedd sydd wedi’u gwahanu gan y coronafeirws,” meddai.
“Rwy’n gwybod fod Ramadan wedi bod yn brofiad gwahanol iawn eleni, i’r blynyddoedd diwethaf.
“Yn ystod Eid eleni, gobeithio y gwnewch chi ymuno â mi yn meddwl am y cyfraniad enfawr mae cymunedau Mwslimaidd Cymru wedi ei wneud i’n cymdeithas bob dydd.
“Ar ran Llywodraeth Cymru, hoffaf anfon fy nymuniadau gorau at bawb sy’n dathlu.
“Eid Mubarak.”
Eid Mubarak i bawb yng Nghymru sy’n dathlu diwedd y mis sanctaidd Ramadan.
Mae Ramadan wedi bod yn wahanol iawn blwyddyn yma, ond mae eich cryfder a’ch creadigrwydd wedi fy llenwi â gobaith.#Ramadan2020 pic.twitter.com/PK8jM5x72j
— Mark Drakeford (@fmwales) May 23, 2020