Lle rhyfedd ydy Ynys Môn!
Mae yno gyngor sir sydd mor gecrus, mae’r cynghorwyr sydd wedi eu hethol wedi eu diswyddo i bob pwrpas…Comisiynwyr anetholedig sy’n rhedeg y sioe, a hynny am £500 y dydd, diolch yn fawr.
Roedd y Prif Weithredwr Dros Dros David Bowles ar dros chwarter miliwn y flwyddyn…mewn sir sy’n cael ei chyfrif ymhlith y tlotaf ym Mhrydain.
Wedyn mae ganddoch chi’r dadlau ffyrnig dros gael ail atomfa niwclear ar arfordir ddwyreiniol yr ynys…mwy o ffraeo.
Ac roeddwn i wedi disgwyl y byddai presenoldeb darpar Frenin Lloegr a’i wraig ar yr ynys, yn esgus arall dros anghydweld a llyncu mul…ond nid felly y bu.
Mae’r cenedlaetholwyr wedi bod yn rhyfeddol o dawel, o gymharu â’r hyn gafwyd adeg arwisgo Pruns Charles yn 1969.
Y stori ora’ glywish i erioed am Fôn oedd hanes y Cymry yn cael eu tyrffio allan o Fiwmares gan y Saeson – O’r fath sarhad! – er mwyn i’r concwerwyr gael adeiladu tai haf a chwarae yn y dŵr.
Fe gafodd y Cymry tlawd eu hel i fyw mewn pentref gwneud o’r enw Niwbwrch (Newborough oedd yr enw gwreiddiol – chwarae teg, roedd y Saeson ddigon clên i roi enw ar y lle newydd!) ym mhen arall yr ynys.
Ond does dim o ddicter hunangyfiawn y Cymro, y teimlad yna o fod wedi cael cam, wedi ymddangos yn agwedd y Moniars at ddyfodiad William Wales yn eu plith.
Roeddan nhw hyd’noed i’w gweld yn ddigon bodlon pan gafodd yr enw ‘Monwysyn’ ei ddiddymu dros nos gan yr erchyll ‘Anglesonian’.
Wel mae’r croeso sydd wedi ei estyn at Wills a Kate wedi dechrau talu ei ffordd.
Mae’r llyfr Lonely Planet, sy’n ddylanwad mawr ar deithwyr, wedi dweud mai arfordir Cymru yw’r peth gorau yn y byd i gyd yn grwn, gyda llefarydd yn nodi “nawr fod Wills a Kate wedi ymgartrefu yn yr ardal mae wedi derbyn sêl bendith brenhinol hefyd.”
Ac mae’r cwmni sy’ wedi creu’r gêm Mônopoli, sef fersiwn Ynys Môn o Monopoly, wedi dweud bod y cyswllt brenhinol yn hollbwysig.
“Cafodd Mônopoli ei gynhyrchu oherwydd bod Ynys Môn wedi ei roi ar fap y byd gan y Briodas Frenhinol ac mae’n llawn cyfeiriadau brenhinol gan gynnwys llun o Dduges Caergrawnt ar gaead y blwch,” meddai Mark Hauser o Winning Moves UK.
Peth da i Fôn ydy presenoldeb Wills a Kate…trafodwch!
