Honni fod Boris Johnson yn aberthu swyddi Cymreig “er lles ei uchelgais ei hun”

Diweddarwyd am  
Yr Aelod Seneddol yn gwenu

Christina Rees

Llun oddi ar wefan www.christinarees.org

Byddai Boris Johnson yn barod i aberthu miloedd o swyddi gweithgynhyrchu Cymreig er mwyn “gwireddu ei uchelgais ei hun”, yn ôl aelod blaenllaw o’r Blaid Lafur.

Daw sylwadau Christina Rees, llefarydd Cymru y blaid yn San Steffan, ar ôl i Alun Cairns, Ysgrifennydd Cymru, ddatgan ei gefnogaeth i’r cyn-Weinidog Tramor yn y ras i arwain y Blaid Geidwadol.

Yn ôl Ms Rees, byddai Brexit heb gytundeb – rhywbeth y mae Boris Johnson yn cadw meddwl agored amdano – yn drychinebus i economi Cymru.

Mae pryderon y gallai Brexit heb gytundeb ar Hydref 31 effeithio’n sylweddol ar ffermwyr Cymru drwy ostwng prisiau cig i lefel isel iawn.

“Sut allwch chi gyfiawnhau eich cefnogaeth i ymgeisydd i fod yn brif weinidog sy’n barod i aberthu miloedd o swyddi gweithgynhyrchu yng Nghymru i wireddu ei uchelgais personol ei hun?” oedd ei chwestiwn i Alun Cairns.

“Dw i’n siomedig eich bod chi’n ceisio tanseilio economi Cymru,” meddai Alun Cairns wrth ymateb.

“Doeddech chi yn fodlon cydnabod fod diweithdra wedi cyrraedd record o ran lefelau isel, fod gweithgarwch economaidd wedi cyrraedd record o ran lefelau uchel, fod allforion yn tyfu, fod gweithgynhyrchu’n llewyrchu, ac mae angen i chi gydnabod hynny.”

Ac fe gyhuddodd e Christina Rees ac eraill a bleidleisiodd yn erbyn y Cytundeb Ymadael o wneud y sefyllfa’n waeth drwy gynyddu’r ansicrwydd a’r tebygolrwydd o sicrhau Brexit heb gytundeb.

Ond mae Ms Rees yn mynnu na fyddai hi fyth am wanhau Cymru.

“Rwy’n falch o’m gwlad ac rwy’n falch o fod wedi cynrychioli Cymru droeon,” meddai’r fargyfreithwraig a chyn-chwaraewraig sboncen.

“Pan ydych chi’n gwisgo’r crys coch hwnnw, does dim byd tebyg iddo.

“O gofio eich cefnogaeth amlwg i Brexit heb gytundeb fel pris sy’n werth ei dalu am gadw eich swydd eich hun, beth, tybed, allwch chi ei ddweud wrth y bobol hynny yng Nghymru sy’n wynebu colli eu swyddi gweithgynhyrchu o ganlyniad i fethiant catastroffig eich Llywodraeth wrth ymdrin â thrafodaethau Brexit?”

“Byddwn yn tynnu sylw at y ffaith fod gweithgynhyrchu’n gwneud yn dda yn economi Cymru, gyda 12,000 yn fwy o swyddi gweithgynhyrchu yn yr economi nag yr oedd yn ôl yn 2010,” meddai wrth ymateb eto.

Plaid Cymru’n beirniadu hefyd

Ac wrth iddi ychwanegu ei llais hithau at y ddadl, dywed AS Plaid Cymru dros Dwyfor-Meirionydd Liz Saville Roberts fod rhaid i Lywodraeth Prydain gymryd cyfrifoldeb am yr effaith fydd Brexit yn ei gael ar ffermwyr defaid yng Nghymru.

“Mae tariffau o 46% sydd yn cael eu cyflwyno ar Hydref 31 yn cyd-daro’n union â’r tymor pan ddaw wyn mynydd i’r farchnad i’w hallforio,” meddai, wrth wahodd Alun Cairns i gynnig eglurhad i ffermwyr.

“Roedd undebau amaeth yng Nghymru’n cefnogi’n gryf y cytundeb a gafwyd rhwng y Prif Weinidog a Chomisiwn Ewrop,” meddai Alun Cairns wrth ymateb, gan ei beirniadu hi am wrthwynebu’r cynllun Brexit.

 

Cefn Gwlad

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Cofio Eirwyn Pontsiân – darlith Lyn Ebenezer