Cymru v Awstralia: pryderon am Jonathan Davies

Diweddarwyd am  
Logo Undeb Rygbi Cymru

Llun: Undeb Rygbi Cymru

Mae pryderon na fydd seren tîm rygbi Cymru, Jonathan Davies ar gael am weddill yr hydref ar ôl anafu ei goes ar ddiwedd y gêm yn erbyn Awstralia yn Stadiwm Principality neithiwr.

Wrth i’r chwiban olaf chwythu i ddod â’r ornest i ben, ac Awstralia’n ennill o 29-21, roedd y canolwr ar wastad ei gefn ar ôl cael anaf i’w ffêr.

Daw’r anaf bythefnos yn unig cyn ymweliad Seland Newydd â Chaerdydd, ac fe ddywedodd y prif hyfforddwr Warren Gatland nad yw’r anaf yn “edrych yn wych”.

Fe fydd Cymru’n asesu’r anaf yn ystod y dydd heddiw.

13 colled o’r bron yn erbyn Awstralia

Hon oedd trydedd colled ar ddeg Cymru o’r bron yn erbyn Awstralia.

Seliodd yr ymwelwyr y fuddugoliaeth gyda cheisiau yn yr hanner cyntaf gan Tatafu Polota-Nau, Adam Coleman a’r capten Michael Hooper. Sgoriodd Kurtley Beale gais o bell ar ôl 61 munud wrth iddo rwygo’r bêl o afael Cymru.

Roedd tri throsiad i Bernard Foley a chic gosb i Reece Hodge, wrth i Leigh Halfpenny gicio tair cic gosb a throsiad i Gymru.

Roedd rhai elfennau addawol o safbwynt Cymru, gan gynnwys ceisiau i Steff Evans a Hallam Amos, ond fe fydd rhaid iddyn nhw wella’n amddiffynnol er mwyn osgoi crasfa gan y Crysau Duon.

Meddylfryd

Mae prif hyfforddwr Cymru, Warren Gatland wedi gwadu bod meddylfryd y Cymru wedi eu rhwystro rhag ennill y gêm – gan ymestyn y rhediad o golledion yn erbyn Awstralia a ddechreuodd yn 2008.

Fe fyddan nhw’n mynd benben unwaith eto’r flwyddyn nesaf yng Nghwpan y Byd.

Dywedodd Warren Gatland: “Dw i ddim yn meddwl fod unrhyw beth wedi dangos heddiw fod yna rwystr yn feddyliol o safbwynt chwarae yn erbyn Awstralia.

“Ni oedd penseiri ein siom ein hunain heddiw oherwydd doedden ni ddim yn ddigon cywir yn yr hanner cyntaf.

“O ystyried eu perygl nhw fel tîm ymosodol, fe wnaethon ni hi’n hawdd iddyn nhw. Roedden ni’n fwy cywir wrth i’r gêm fynd rhagddi.

“Does neb yn meddwl o gwbl am rwystr yn feddyliol wrth herio Awstralia.”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd