Cneifwyr y Byd yn Cyrraedd Cymru

Ddydd Sadwrn (17 Gorffennaf) cynhaliwyd cystadleuaeth ‘Cneifio Llanbed’ ar fferm Capeli, ger y dref. Roedd arwyddocad arbennig i’r gystadleuaeth eleni gan bod Pencampwriaeth y Byd i’w chynnal yn y sioe frenhinol yn Llanelwedd yr wythnos hon, a bod disgwyl i nifer o’r cystadleuwyr heidio i Lanbed fel ymarfer. Catrin Jones fu yno ar ran Golwg360.com i weld pwy fyddai’n creu argraff cyn y gystadleuaeth fawr yn Llanewedd.

Daeth cannoedd o gneifwyr o bedwar ban byd i gystadleuaeth Cneifio Llambed echdoe ar Fferm Capeli, ger Llambed. Agorodd y diwrnod am 8.30 y bore i sied lawn o gystadleuwyr a chefnogwyr a fu yno hyd at gystadleuaeth derfynol: tîm cneifio Seland Newydd yn erbyn tîm cneifio Cymru.

Mae’r digwyddiad yn denu tyrfa niferus o gystadleuwyr a chefnogwyr yn flynyddol, ond roedd naws ryngwladol iawn i’r diwrnod eleni gan fod Pencampwriaeth Cneifio’r Byd ond ychydig ddiwrnodau, ac ychydig filltiroedd i ffwrdd.

Yn ystod y Sioe Frenhinol eleni fe fydd cneifwyr o bob cwr o’r byd yn cystadlu yn erbyn ei gilydd yn yr adrannau Cynradd, Canol, Uwchradd ac Agored – a’r adrannau yn dibynnu ar safon y cneifiwr. Fel paratoad ar gyfer y Bencampwriaeth, roedd cynrychiolaeth amlwg iawn o Ffrainc, Sbaen, Norwy a Seland Newydd wedi dod i Fferm Capeli echdoe er mwyn cael ymarfer munud olaf yn erbyn eu gwrthwynebwyr – gan gynnwys y Pencampwr Byd, David Fagan, sydd yn mynd i geisio cadw ei deitl am y chweched tro eleni.

Digwyddiad teuluol

Roedd yr amrywiaeth o bobl yn y gynulleidfa yn glir ar unwaith wrth sylwi ar y Ffrancwyr yn eu berets mewn un cornel, a’r cefnogwyr lleol selog a’u capiau fflat mewn cornel arall, ond roedd digon yn gyffredin rhyngddyn nhw i gyd er hynny – ac nid y cneifio yn unig oedd hynny! Roedd y naws deuluol, glos iawn ymysg y dyrfa yn ddigon amlwg, gyda theuluoedd cyfan yn troi allan i gefnogi eu cneifwyr. Digwyddiad teuluol oedd hi, yn wir, i un teulu o Lanarth, gyda Rhodri, y tad, yn cystadlu yn yr adran Uwchradd, tra bod ei wraig Anwen a’u meibion Glyn a Gwion yn gweithio’n galed yn y cefn yn rhannu’r defaid yn y llociau.

Roedd Gareth Evans, Pencampwr Cymru, yno hefyd yn rhoi help llaw i’w frawd Gwion gyda’r defaid yn y llociau wrth iddo gneifio. Roedd y ddau yn cystadlu yn erbyn ei gilydd yn yr adran Agored – gyda Gareth yn cyrraedd y chweched safle ar ddiwedd y dydd – ond roedd y cystadlu yn amlwg yn mynd law yn llaw â’r gefnogaeth i’r ddau frawd o Ddinbych.

Merched yn cystadlu

Roedd merch un-ar-hugain oed o Seland newydd yno’n cystadlu hefyd. Dyna’r tro cyntaf i Cushla Gordon gystadlu ar gneifio yn yr adran Gynradd, er ei bod wedi bod yn cneifio ers yn un-ar-bymtheg oed gyda’i thad a’i chariad – y ddau yn gneifwyr proffesiynol.

O ystyried y teimlad cyffredinol fod diwrnod Cneifio Llambed yn ddigwyddiad i’r teulu cyfan, braf oedd gweld y merched yn bwrw ati i gystadlu benben â’r dynion yn ystod y dydd. “Mae pob un yn cystadlu yn erbyn ei gilydd mewn cneifio” meddai Cushla, “does dim ots ai dyn neu fenyw sydd wrthi. Y peth pwysig i ffermwr, ar ddiwedd y dydd, yw pa mor effeithiol yw’r cneifiwr – boed ddyn neu fenyw.”

Gyda’r Sioe Frenhinol ar fin dechrau, a Phencampwriaeth Cneifio’r Byd yn dod i Gymru, roedd y cyffro ar gyfer yr wythnos i ddod yn amlwg ar Fferm Capeli ddoe. Mae’n 16 o flynyddoedd wedi pasio ers i’r Bencampwriaeth ddod i Gymru ddiwethaf – gobeithio y bydd hynny’n ddigon o ysgogiad i dîm Cneifio Cymru wrth iddyn nhw fynd ati i herio’r byd yn y cneifio yr wythnos hon – a thrawsnewid y sgôr yn erbyn tîm cneifio Seland Newydd ddoe!

Y canlyniadau llawn

ADRAN	1	2	3	4	5	6
Cynradd	Brendan Graham	Emyr Jones	Aled Davies	Cushla Gordon	Scott Chapman	Oliver Jones
Canol	Stephen Rowberry	Frank Lloyd	Geraint Evans	Gareth Jones	Aled Thomas	Dewi Pugh
Uwchradd	Mathew Evans	Mathew Rees	Aled Jones	Gareth Hughes	Cheis Griffin	Carwyn Edwards
Agored	John Kirkpatrick	Ivan Scott	Cam Ferguson	Gareth Daniel	Gavin Mutch	Gareth Evans

Tim Cneifio Cymru V Tîm Cneifio Seland Newydd: Seland Newydd yn ennill.