Mae Ken Owens wedi cael ei ddewis yn gapten ar y Scarlets am y chweched tymor yn olynol.
Mae’r wythwr, 32, wedi cael ei ailbenodi gan brif hyfforddwr newydd y clwb rhanbarthol, Brad Mooar.
Mae Ken Owens wedi cynrychioli’r Scarlets ar y cae rygbi 243 o weithiau dros 13 tymor.
Cafodd ei benodi’n gapten am y tro cyntaf yn 2014, ac mae’n cael ei gymharu ag un o sêr y byd rygbi yn yr 1970au, Phil Bennet, a fu’n arwain Clwb Rygbi Llanelli rhwng 1973 a 1979.
Canmol Ken Owens
“Mae pawb dw i wedi siarad â nhw – yn chwaraewr, rheolwyr, staff a’r bwrdd – â meddwl mawr o Ken â’i allu i arwain,” meddai Brad Mooar.
“Mae wedi capteinio a chwarae dros y Llewod, ac wedi bod yn rhan o grŵp arweinwyr Cymru.
“Does dim dwywaith mai fe yw’r dyn cywir i arwain y tîm hwn, y clwb a’i bobol.”
Yr arweinwyr eraill
Mae James Davies, Jonathan Davies, Werner Kruger a Steff Hughes wedi cael eu penodi’n is-gapteiniaid.
Mae disgwyl i Werner Kruger a Steff Hughes gapteinio’r clwb tra bydd Ken Owens a Jonathan Davies i ffwrdd yn cynrychioli Cymru ym mhencampwriaeth Cwpan y Byd.
