Cymru’n curo’r Alban 21-10 yn Stadiwm Principality

Diweddarwyd  
Logo Undeb Rygbi Cymru

Llun: Undeb Rygbi Cymru

Cymru 21–10 Yr Alban

Cafodd Cymru ddechrau da i gyfres yr hydref gyda buddugoliaeth dros yr Alban yn y stadiwm cenedlaethol yng Nghaerdydd brynhawn Sadwrn (Tachwedd 3).

Fe sgoriodd George North a Jonathan Davies y ceisiau hollbwysig wrth i’r Cymry ennill y frwydr Geltaidd a chodi Cwpan Doddie Weir.

Hanner Cyntaf

Roedd George North yn meddwl ei fod wedi sgorio cais cyntaf y gêm wedi deuddeg munud, ond sylwodd y dyfarnwr fideo fod ei droed dros yr ystlys wrth iddo dirio cic Gareth Anscombe.

Bu rhaid i Gymru fodloni, yn hytrach, ar dair cic gosb gan Leigh Halfpenny i’w rhoi naw pwynt ar y blaen cyn i Adam Hastings gau’r bwlch gyda thri phwynt cyntaf yr Alban.

Bu rhaid aros tan ddeg munud olaf yr hanner am geisiau cyntaf y gêm, gyda’r cyntaf yn dod i Gymru wrth i George North rwygo trwy dair tacl i sgorio.

Yr Albanwyr a gafodd y nesaf serch hynny, Stuart McInally yn tirio wedi sgarmes symudol effeithiol, 14-10 y sgôr wrth droi wedi trosiad Adam Hastings.

Ail Hanner

Ymestynnodd Cymru eu mantais gydag ail gais yn gynnar yn yr ail hanner, pêl lân a symudiad taclus o’r lein a Jonathan Davies yn hollti trwy’r amddiffyn i sgorio.

Yr Alban a reolodd y tir a’r meddiant yn hanner awr olaf y gêm ond llwyddodd Cymru i amddiffyn yn effeithiol, a hynny gyda phedwar dyn ar ddeg am gyfnod wedi cerdyn melyn i Elliot Dee.

21-10 y sgôr terfynol felly a dechrau da i Gymru yng nghyfres yr hydref, am newid.

Cymru

Ceisiau: George North 30’, Jonathan Davies 48’

Trosiad: Leigh Halfpenny 49’

Ciciau Cosb: Leigh Halfpenny 5’, 15’, 23’

Cerdyn Melyn: Elliot Dee 69’

.

Yr Alban

Cais: Stuart McInally 35’

Trosiad: Adam Hastings 36’

Cic Gosb: Adam Hastings 26’

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd