Capten Cymru’n disgwyl gêm gorfforol yn yr Ariannin

 
Logo Undeb Rygbi Cymru

Llun: Undeb Rygbi Cymru

Mae capten tîm rygbi Cymru, Cory Hill wedi rhybuddio’i dîm eu bod yn wynebu gêm gorfforol yn erbyn yr Ariannin yn San Juan heddiw.

Bydd Cymru’n ceisio adeiladu ar eu buddugoliaeth o 22-20 dros Dde Affrica yn Washington, wrth i’r prif hyfforddwr Warren Gatland gyhoeddi wyth newid i’r tîm.

Dydy’r Ariannin ddim wedi chwarae ers dechrau’r flwyddyn, ond mae pob aelod o’r garfan yn chwarae i glwb Jaguares.

Dyma gêm gyntaf Cory Hill yn gapten ar Gymru.

Dywedodd: “Fe fydd yn gorfforol iawn ac yn foment falch i fi’n bersonol wrth arwain y tîm. Mae gormod o bobol i ddiolch iddyn nhw am fy mod i wedi cyrraedd y fan hon.

“Ry’n ni wir yn edrych ymlaen at fynd allan yno. Mae’n lleoliad gwych, stadiwm bêl-droed hen ffasiwn gyda weiren bigog o amgylch y cae ac ry’n ni’n gwbod y bydd rhaid i ni gamu i fyny fel blaenwyr.

“Dw i’n sicr y bydd y dorf yn ein herbyn ni o’r funud gyntaf ac mae angen i ni sicrhau ein bod ni’n rhoi llwyfan i’r olwyr.

“Mae gyda ni ddigon o brofiad y tu ôl i’r sgrym ac mae hynny’n wych.”

Newidiadau

Fe fydd Cymru heb eu prop Wyn Jones, sydd wedi dychwelyd i Gymru ar ôl anafu ei goes wrth ymarfer. Daw Rob Evans i’r tîm yn ei le, ac mae Nicky Smith wedi’i ychwanegu at yr eilyddion.

Mae Josh Adams yn dychwelyd i’r asgell ar ôl cael ei neilltuo ar gyfer y gêm yn erbyn De Affrica oherwydd rheolau Undeb Rygbi Lloegr am ryddhau chwaraewyr y tu allan i’r ffenest ryngwladol.

Ar yr asgell arall mae George North, sy’n symud o safle’r canolwr. Hadleigh Parkes a Scott Williams fydd yn dechrau yn y canol.

Partner Cory Hill yn yr ail reng fydd Adam Beard, a daw Rob Evans i mewn i’r rheng flaen ynghyd ag Elliot Dee a Dillon Lewis.

Tîm yr Ariannin

Yn dechrau am y tro cyntaf i’r Ariannin mae’r asgellwr Bautista Delguy.

Y capten yw Agustin Creevy, ac mae Nicolas Sanchez wedi’i ddewis yn safle’r maswr.

 

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd