Glasgow 13–28 Scarlets
Mae’r Scarlets yn rownd derfynol y Guinness Pro14 ar ôl trechu Glasgow yn y rownd gynderfynol yn Scotstoun nos Wener.
Bydd Bois y Sosban yn amddiffyn eu teitl yn Nulyn y penwythnos nesaf wedi buddugoliaeth gyfforddus yn erbyn yr Albanwyr.
Dechreuodd yr ymwelwyr o dde orllewin Cymru ar dân wrth i Rhys Patchell groesi am gais cyntaf y noson wedi dim ond pedwar munud, maswr y Scarlets yn rhy dda i amddiffyn Glasgow yng nghysgod y pyst.
Trosodd Patchell gais ei hun cyn i Finn Russell gau’r bwlch gyda chic gosb i’r tîm cartref.
Y Scarlets a gafodd y cais nesaf serch hynny, Gareth Davies yn croesi o dan y psyt wedi bylchiad gwreiddol Scott Williams.
Roedd y gêm fwy neu lai allan o afael Glasgow erbyn hanner amser diolch i drydydd cais y Cymry, Rob Evans yn sgorio y tro hwn wedi gwrthymosodiad da gan Johnny McNicholl, Steff Evans a Gareth Davies.
Roedd buddugoliaeth y Scarlets yn ddiogel yn gynnar yn yr ail hanner, gyda Nick Grigg yn y gell gosb i Glasgow fe groesodd Ken Owens gyda chymorth ei bac mewn sgarmes symudol effeithiol.
Fe wnaeth y tîm cartref daro nôl wedi hynny ond er i Johnny Gray a Nick Grigg groesi am gais yr un, fe ddaliodd y Scarlets eu gafael yn ddigon cyfforddus yn y diwedd.
Bydd Bois y Sosban yn awr yn wynebu Leinster neu Munster i geisio cadw eu gafael ar deitl y Pro14 yn Stadiwm Aviva yn Nulyn yr wythnos nesaf.
.
Glasgow
Ceisiau: Johnny Gray 60’, Nick Grigg 73’
Cic Gosb: Finn Russell 14’
Cerdyn Melyn: Nick Grigg 47’
.
Scarlets
Ceisiau: Rhys Patchell 4’, Gareth Davies 17’, Rob Evans 32’, Ken Owens 48’
Trosiadau: Rhys Patchell 5’, 18’, 33’, 49’
