Beirniadu’r Cymry am beidio â chanu ‘God Save the Queen’

Ryan Giggs
Mae rhai o aelodau tîm pêl-droed GB yn y Gemau Olympaidd wedi cael eu beirniadu am iddyn nhw beidio â chanu ‘God Save the Queen’ cyn y gêm yn erbyn Senegal neithiwr.

Roedd miloedd o gefnogwyr tîm GB wedi trydar neithiwr yn erbyn penderfyniad y Cymry i beidio â chanu’r anthem Brydeinig.

Gadawodd Ryan Giggs a Craig Bellamy eu cegau ar gau yn ystod yr anthem cyn gêm gyntaf Tîm GB yn y Gemau Olympaidd yn Old Trafford neithiwr.

Rhoddodd Craig Bellamy y tîm cartref ar y blaen yn yr hanner cyntaf ond sgoriodd Moussa Konate i’r ymwelwyr gyda deng munud yn weddill i’w gwneud hi’n 1-1.

Dywedodd llefarydd ar ran Gymdeithas Olympaidd Prydain wrth y Daily Mail mai penderfyniad y chwaraewyr ydi hi i ganu’r anthem ai peidio, ond y dylai bob athletwr Prydeinig “ddangos parch.”

Fe wnaeth dwy Albanes benderfynu peidio â chanu’r anthem Brydeinig cyn gêm gyntaf tîm pêl-droed y merched nos Fercher.

Cafodd y ddwy eu beirniadu’n llym am beidio â chanu ‘God Save the Queen’, sy’n cynnwys y frawddeg “Rebellious Scots to crush.”

Tîm GB 1 – 1 Senegal

Roedd rheolwr Tîm GB, Stuart Pearce, yn siomedig â’r gêm gyfartal gan ddweud mai “nerfau” oedd wedi cael y gorau o’i dîm yn ystod y gêm.

Roedd capten Tîm GB, Ryan Giggs, yn feirniadol o daclo caled y tîm o Affrica.

Daeth Joe Allen a Craig Bellamy oddi ar y cae oherwydd anafiadau, ond mae disgwyl i’r ddau fod yn holliach ar gyfer y gêm yn erbyn UAE ddydd Sul.

“Wyddwn i ddim faint o weithiau wnaeth Sadio Mane (chwaraewr Senegal) droseddu, ond yn yr Uwchgynghrair, byddai wedi cael ei ddanfon o’r cae ddwy neu dair gwaith,” meddai Ryan Giggs.

Cafodd y tîm cartref wrthod cic o’r smotyn wedi i Craig Bellamy gael ei lorio tu fewn i’r cwrt cosbi pan oedd y gêm yn 1-0 i dîm GB.

11 sylw

Gareth Williams 27 Gorffennaf 2012, 08:49

Da iawn nhw. Er yn anghytuno gyda’r penderfyniad i chwarae – eu hedmygu am wneud safiad. Nid ein hanthem ni yw God Save the Queen – anthem Lloegr yw hi.

DC 27 Gorffennaf 2012, 09:26

Ac o ystyried cyfraniad y Cymry at y gem fe allai’r Saeson fod ychydig yn llai pigog a chroendenau.

Sion 27 Gorffennaf 2012, 10:57

Mae pwysau mawr arnyn nhw i ganu yn y gemau nesaf. Angen i’r Cymry ddangos eu cefnogaeth gyhoeddus i’w penderfyniad i beidio canu, trydar ac ati.

Neilyn 27 Gorffennaf 2012, 11:15

Peidio canu GSTQ = dial Joe Allen?!

Dewi 27 Gorffennaf 2012, 12:18

Ydi Giggs a Belamy erioed wedi canu Hen Wlad fy Nhadau?

Medwen Scourfield 27 Gorffennaf 2012, 13:04

Gareth et al. Ni ddylid fod wedi dod a’r pedwar tim at ei gilydd. Ond o ddod a nwh at ei gilydd – a doedd dim rhaid i Ryan Giggs na neb arall gytuno i chwarae – dyletsywdd pob chwareuwr oedd canu Anthem Genedlaethol gwledydd Prydain – God Save the Queen. Mae’n bryd i ni stopio chware plant am y pethau hyn – dyna yw anthem gwledydd Prydain (nid Lloegr) p’un ai hoffwn ni neu peidio pan byddwn yn ymddangos fel y Deyrnas Unedig ac mae’n bryd i ni dyfu lan a derbyn hynny. Os ydy Giggs gymnaint a hynny o Gymro yna peidio chwarae i Brydain fyddai’r ffordd ymlaen nid rhyw nonsens o ddweud rwy’n Brydeinwr er mwyn cael chwarae ond yn anfodlon canu’r anthem. Does genny’ ddim amser i’r smalio cenedlaetholdeb hyn – mae’n bryd i ni dyfu lan a thra bod gennym basportiau Prydeinig derbyniwn ein bod yn Brydeinwyr. Nid yw hynny yn gwneud neb llai o Gymro.

Gethin 27 Gorffennaf 2012, 13:58

Da iawn wir. Fyswn i ddim chwaith yn canu ANTHEM LLOEGR! Nid yw hi’n frenhines arnaf fi, felly ni fuasai’r geiriau hynny yn dod allan o’n ngheg.

Ac o ran cystadlu i dîm Prydain, pa ddewis arall sydd yno i unigolion Cymreig ac Albanaidd? Peidio cael gyrfa? O leiaf fe allen nhw benderfynu peidio canu’r anthem.

A @Medwen, o ran gwybodaeth, mae gen i basport Prydeinig ond ddim o ran dewis chwaith! Fe wnes i bopeth yn fy mhwer i gael ‘Cymro’ i lawr fel cenedligrwydd ac i gael y pasport ei hun yn ddywieithog, ond doeddwn i’m yn cael. Fatha popeth arall ‘Prydeinig’ mae’n cael ei orfodi ar bobl.

pleidleisiwr 27 Gorffennaf 2012, 16:25

“mae’n bryd i ni dyfu lan a thra bod gennym basportiau Prydeinig derbyniwn ein bod yn Brydeinwyr. Nid yw hynny yn gwneud neb llai o Gymro.”

Mae Prydeindod fel arfer yn niweidiol i’r Gymraeg, naill ai’n fwriadol neu’n anfwriadol.

Medwen Scourfield 27 Gorffennaf 2012, 19:17

Dyma ni – fel Cymry eto fyth yn gwylltio ac yng anghofio bod yn rhesymegol. P’un ai ydym yn ei hoffi neu beidio (a dydw i ddim) ar y foment Prydeinwyr ydym yn gyfreithiol, yn wladwriaethol ac yn rhyngwladol. Does genny’ ddim problem i fod yn Gymraes ac yn Brydeinwraig ac yn Ewropwraig. Rhyw ddiwrnod gobeithio bydadf yn medru hepgor y term canol yna ond yn gyfredol dyna ydwyf, dyna yw fy mhasport a dydw fawr callach o godi;n ngwrychyn am y peth ond gweithio trwy’r blwch pleidleiso ac ati i newid pethau. Tra byddaf yn Brydeinwraig fe wnaf barchu beth sy’n rhan o’r pecyn hwnnw, yn union fel y parchaf anthem rhyngwladol Ewrop. Beth ddylai Riggs fod wedi ei wneud os nad yw’n hoffi bod yn Brydeinwr – wel peidio chwarae wrth gwrs! Gall Prydeindod fod yn niweidiol i;r Gymreag – mae pleidleisiwr yn gwbl gywir – ond gal Cymreictod fod yn berygl i’r Gymraeg hefyd pan fydd yn genedlaetholdeb unllygeidiog myopig. Nid yw diffyg parch at realiti a chyfundrefnau a phobl yn mynd i wella sefyllfa Cymru .

Owain Meredith 27 Gorffennaf 2012, 19:54

Dani yn brydeinwyr wrth natur ein hanes a’n bod ni’n byw ar ynysoedd prydain, ni yw’r Prydeinwyr gwreiddiol wedi’r cyfan!

Ond dyw hynny ddim yn golygu fod yn rhaid inni dderbyn agweddau sy’n amharchus i hunaniaeth Cymru, dwi ddim yn deall eich dadl Medwen!

Gareth Williams 27 Gorffennaf 2012, 23:18

Da iawn JG – pleidiol wyf innau. Os na safwn ni pwy a saif?

Mae’r sylwadau wedi cau.

Beirniadu’r Cymry am beidio â chanu ‘God Save the Queen’

Bellamy’n sgorio, ond gêm gyfartal i Dîm GB

Poblogaidd

Swyddi

Cyfarwyddwr Astudiaethau Caplaniaeth

Swyddog Arweiniol Data

Swyddog Prosiect Ymbweru Bro (ardal Wrecsam)

Crëwr Cynnwys Digidol

Aelodau Cyngor Celfyddydau Cymru

Tiwtor Cymraeg ar gyfer y Gweithlu Addysg

Rheolwr Aelodaeth

Peiriannydd

Seicolegydd Addysg Cyfrwng Cymraeg

Cydlynydd Corfforaeth Undeb Bedyddwyr Cymru

← Stori flaenorol

Chwaraewyr Abertawe’n “byw yn yr eiliad” cyn y gemau ail gyfle

Stori nesaf →

Proffiliau Cymry’r Gemau Olympaidd: Codi Pwysau

Hefyd →

Aaron Ramsey allan am weddill y tymor

11 sylw