Abertawe v Preston: “gêm anodd” wrth geisio ymestyn record

 

Mae Steve Cooper, rheolwr tîm pêl-droed Abertawe, yn disgwyl “gêm anodd” wrth i’r Elyrch geisio ymestyn eu rhediad di-guro o 12 gêm gynghrair yn Stadiwm Liberty – y rhediad gorau ers 2011.

Mae’r tîm yn ddi-guro ym mhob gêm o dan y rheolwr o Bontypridd hyd yn hyn, a heddiw yn wynebu tîm Preston, a oedd wedi curo Wigan o 3-0 yr wythnos ddiwethaf.

Ar y llaw arall, mae Preston heb fuddugoliaeth mewn 17 o gemau yn Abertawe.

“Rydyn ni’n sicr am barhau â’r record honno oherwydd os gallwch chi fod yn gryf gartref, all hynny ond bod yn beth da,” meddai Steve Cooper ar drothwy’r gêm.

“Ond rhaid i ni sicrhau ein bod ni’n rheoli’r hyn sydd o’n blaenau ni.

“Dim ond os nad ydych chi’n cymryd yn ganiataol eich bod chi’n mynd i ennill gêm bêl-droed oherwydd eich bod chi gartref y gallwch chi gadw’r peth i fynd.”

Mae gan Steve Cooper garfan lawn i ddewis ohoni, ac eithrio Tom Carroll, y chwaraewr canol cae sy’n parhau i wella o anaf i’w goes wrth chwarae i’r tîm dan 23 ar hyn o bryd.

Fe ddylai’r ymosodwr Aldo Kalulu fod yn holliach er nad oedd e ar gael i herio Northampton yng Nghwpan Carabao nos Fawrth.

O ran y gwrthwynebwyr, fydd yr ymosodwr David Nugent ddim ar gael oherwydd anaf i’w goes.

Ystadegau allweddol

Mae Preston wedi colli wyth allan o’r 11 gêm flaenorol yn erbyn Abertawe ym mhob cystadleuaeth, gan ennill dwy yn unig, a’r llall yn gorffen yn gyfartal.

Chwarter awr ola’r gêm sydd fel arfer yn allweddol i’r Elyrch, a does neb wedi wynebu mwy o ergydion yn y cyfnod hwnnw na’r Cymry – ond dwy ergyd ar gyfartaledd yw record Preston yn ystod yr un cyfnod y tymor hwn.

Unwaith yn unig mae Preston wedi ennill gêm gynghrair yng Nghymru yn eu 13 ymweliad diwethaf – a honno’n dod yn erbyn Caerdydd ym mis Rhagfyr 2017.

Dim ond dwywaith mae Alex Neil, rheolwr Preston, wedi ymweld â Stadiwm Liberty ac mae e wedi colli o 1-0 y ddau dro.

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd