Cit, rheolwyr a chwaraewyr newydd i Glwb Pêl-droed Bangor 1876

 
Bangor 1876 Les Davies Michael Johnston

Les Davies (chwith) a Michael Johnston (dde) wedi ymuno â Chlwb Pêl-droed Bangor 1876

Llun: Clwb Pêl-droed Bangor 1876

Mae Clwb Pêl-droed Bangor 1876 wedi cyhoeddi mai Mel Jones fydd eu rheolwr newydd, gyda Dylan Williams yn ei gynorthwyo.

Ac maen nhw hefyd wedi arwyddo Les Davies a Michael Johnston i’r garfan.

Mewn datganiad, mae’r clwb yn dweud iddyn nhw benodi Mel Jones “nid yn unig am ei allu fel hyfforddwr, ond hefyd am ei enw da am ddatblygu doniau ifainc”.

Mae Dylan Williams hefyd yn dod â phrofiad o ddatblygu chwaraewyr ifainc, ac yntau’n allweddol wrth sefydlu Academi Clwb Pêl-droed Llandudno. Bydd yn ennill ei gymhwyster Trwydded A wrth ei waith.

Chwaraewyr newydd

Wrth gyhoeddi bod Les Davies a Michael Johnston yn ymuno â’r garfan, dywed y clwb iddyn nhw orfod brwydro yn erbyn clybiau eraill i’w denu i’r clwb.

Rhyngddyn nhw, mae ganddyn nhw werth 600 o gemau o brofiad yn Uwch Gynghrair Cymru, ynghyd â medalau enillwyr pencampwriaeth Uwch Gynghrair Cymru a Chwpan Cymru.

Byddan nhw hefyd yn hyfforddi’r to iau yn ystod y tymor i ddod, wrth iddyn nhw baratoi am yrfa ar ôl ymddeol o chwarae.

“Mi ydw i wir wedi cyffroi ac yn edrych ymlaen at yr her sydd o ‘mlaen i,” meddai Les Davies.

“Dw i wedi ymroi i roi clwb pêl-droed i’r cefnogwyr fedran nhw ymfalchïo ynddo fo, ac un fedran nhw a’r gymuned ei gefnogi.”

“Mae pobol Bangor yn agos at fy nghalon i, ac mae’n gyfle cyffrous dw i’n falch o fod ynghlwm wrtho fo,” meddai Michael Johnston.

“Dw i wir yn edrych ymlaen at rannu fy mhrofiad efo doniau ifainc lleol a gobeithio y bydd hyn yn eu rhoi nhw a Bangor 1876 mewn sefyllfa dda ar gyfer y dyfodol.”

Cit newydd

Teejac Sports fydd yn cyflenwi cit i’r clwb, gan adlewyrchu ymrwymiad y clwb i gydweithio â chwmnïau lleol.

Lliwiau gwreiddiol y clwb fydd yn cael eu defnyddio ar gyfer y cit, sef crysau glas ag amlinelliad coch, siorts gwyn a sanau glas.

Oddi cartref, bydd y chwaraewyr yn gwisgo crysau, siorts a sanau coch gydag amlinelliad glas.

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd