“Penderfyniad anodd” Alan Curtis i ymddeol

 

Mae Alan Curtis yn dweud ei fod e wedi gwneud “penderfyniad anodd” i ymddeol o’r byd pêl-droed ar ddiwedd y tymor.

Fe fydd yn dod yn Llywydd Anrhydeddus Clwb Pêl-droed Abertawe, ar ôl 40 o flynyddoedd o wasanaeth i’r clwb.

Daeth ei benderfyniad ddoe (dydd Mawrth, Ebrill 16) ar ei ben-blwydd yn 65 oed, wrth i’r clwb geisio cwtogi ar ei staff yn dilyn y gwymp o Uwch Gynghrair Lloegr i’r Bencampwriaeth ar ddiwedd y tymor diwethaf, a diswyddo gwirfoddol yn cael ei gynnig i’r staff.

Yn chwaraewr, roedd yn aelod o’r tîm llwyddiannus a gododd o’r Bedwaredd Adran i’r Adran Gyntaf o dan reolaeth John Toshack.

Sgoriodd e 110 o goliau i gyd mewn mwy na 400 o gemau dros dri chyfnod gwahanol gyda’r clwb, lle bu’n swyddog cymunedol, hyfforddwr y tîm ieuenctid, hyfforddwr y tîm cyntaf, is-reolwr, rheolwr dros dro, llysgennad diwrnod gemau, pennaeth datblygiad ieuenctid a rheolwr chwaraewyr ar fenthyg.

‘Yr amser iawn’

Ac mae e bellach yn dod yn Llywydd Anrhydeddus, rôl sy’n wag ers marwolaeth Gwilym Joseph ddwy flynedd yn ôl.

“Roedd yn benderfyniad anodd ond mewn nifer o ffyrdd, yn benderfyniad hawdd hefyd,” meddai. “Fy mhen-blwydd yn 65 oed oedd yr amser iawn i wneud y cyhoeddiad.

“Gêm i ddynion ifainc yw hi, yn sicr, a dw i’n teimlo mai nawr yw’r amser iawn. Ro’n i’n gwybod pan o’n i’n chwarae pryd oedd yr amser cywir i orffen, a dw i’n teimlo’r un fath nawr.

“Mae fy niwrnodau’n hyfforddi yn dod i ben. Dw i wedi cael amser gwych a nawr, mae’n bryd i’r hyfforddwyr iau gamu i fyny.

“Does gyda fi ddim amheuaeth y bydd pwy bynnag sy’n dod i mewn yn fy lle yn gwneud gwaith gwych mewn clwb pêl-droed gwych.”

Pêl-droed

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd