David Vaughan
Dyw chwaraewr canol cae Cymru, David Vaughan heb arwyddo i Sunderland er gwaethaf adroddiadau fel arall.
Mae dyfalu wedi bod am ddyfodol y Cymro Cymraeg o Abergele ers i’w glwb, Blackpool golli eu lle yn yr Uwch Gynghrair ddydd Sul.
Roedd adroddiadau cyn hynny bod Sunderland yn awyddus iawn i gael gafael ar y chwaraewr – mae ei gytundeb ar ben gyda Blackpool felly byddai’n cael symud i glwb arall am ddim.
Gwadu adroddiadau
Roedd nifer o flogiau a gwefannau cefnogwyr Blackpool yn honni ddoe bod Vaughan wedi arwyddo cytundeb tair blynedd gyda Sunderland, ond mae ei wraig wedi gwadu hynny ar wefan Twitter heddiw.
“Dim ond i glirio pethau fyny, dyw David DDIM wedi arwyddo i Sunderland” tydarodd Cat Vaughan bore yma.
Mae Vaughan wedi cael tymor arbennig o dda yn yr Uwch Gynghrair, ac ynghynt yn yr wythnos fe gipiodd wobr ‘Chwaraewr y Flwyddyn’ yng ngwobrau blynyddol ei glwb.
Yn ogystal â Sunderland, mae’n debyg bod Wigan, Bolton ac Everton yn awyddus i arwyddo dros yr haf.
Mae Blackpool hefyd wedi cynnig cytundeb newydd iddo, ond y tebygolrwydd yw bydd y Cymro’n symud i dîm sydd yn yr Uwch Gynghrair.
Dim cytundeb i Edwards
Un chwaraewr sydd heb gael cynnig cytundeb newydd gan Blackpool ydy’r Cymro Rob Edwards.
Mae’r amddiffynnwr 29 oed yn un o 11 o chwaraewyr sydd wedi eu rhyddhau gan y clwb ar ôl iddynt gwympo’n ôl i’r Bencampwriaeth.
Mae Edwards wedi cael tymor rhwystredig a phrin wedi chwarae i’r tîm cyntaf. Fe fu ar fenthyg gyda Norwich dros fisoedd olaf y tymor.
