Canmol Llanelli ar ôl cipio’r cwpan

Andy Legg
Mae rheolwr Llanelli, Andy Legg, wedi canmol ei chwaraewyr yn dilyn eu buddugoliaeth yn erbyn Bangor yn rownd derfynol Cwpan Cymru.

Fe gurodd y Cochion dîm Nev Powell 4-1 ym Mharc y Scarlets er mwyn sicrhau eu lle yng Nghynghrair Europa y tymor nesaf.

Roedd y fuddugoliaeth yn golygu nad yw Bangor wedi cipio’r dwbl – ar ôl ennill Uwch Gynghrair Cymru y penwythnos cynt.

Diwedd ar record Bangor

Daeth record ddiguro Bangor yn y gystadleuaeth i ben ar ôl iddyn nhw ennill Cwpan Cymru dair gwaith yn olynol.

“Mae gan Fangor record wych yn y gwpan ac roedden ni’n gwybod y byddai eu maeddu nhw yn anodd. Ond roedden ni’n ymwybodol y byddai modd ennill pe baen ni’n chwarae’n dda,” meddai Andy Legg.

“Roedd y chwaraewyr yn wych chwarae teg. Maen nhw’n haeddu pob llwyddiant ac maen nhw wedi bod yn chwarae’n dda ers y Nadolig.”