RSS

Golwg360

MwyCau 

Neil Taylor ar ei ffordd o Abertawe

Ionawr 30, 2017 14:56 Diweddarwyd am 20:24


Neil Taylor (llun: Nick Potts/PA)
Mae cefnwr chwith Abertawe a Chymru, Neil Taylor ar ei ffordd i Aston Villa gyda diwrnod yn weddill o’r ffenest drosglwyddo bresennol.

Dydy’r trosglwyddiad ddim wedi’i gwblhau eto, ond mae lle i gredu y gallai’r manylion gael eu cadarnhau cyn diwedd y dydd heddiw.

Mae’r trosglwyddiad yn gweld yr asgellwr Jordan Ayew yn dod i Stadiwm Liberty, ac fe allai Aston Villa dderbyn £5 miliwn fel rhan o’r trosglwyddiad.

Mae e’n cynrychioli Ghana yng Nghwpan Gwledydd Affrica ar hyn o bryd ac felly mae’r Elyrch yn dibynnu ar brawf meddygol a gafodd ei gwblhau cyn iddo deithio.

Neil Taylor yn drydydd dewis

Prin fu cyfleoedd Neil Taylor y tymor hwn gyda Stephen Kingsley yn dechrau nifer o gemau o dan Francesco Guidolin a Bob Bradley.

Ac erbyn hyn mae Martin Olsson wedi cyrraedd o Norwich, sy’n golygu i bob pwrpas mai trydydd dewis fyddai Neil Taylor am weddill y tymor.

Dywedodd Paul Clement: “Dim ond dau gefnwr chwith sydd eu hangen. Ond mae Neil wedi bod yn was ffyddlon i’r clwb ers saith mlynedd.

“Mae angen her newydd arno fe ac ry’n ni’n dymuno’n dda iddo fe.

“Fe ddywedodd e fod y cyfle wedi dod ac roedd e am fanteisio arno fe, ac ro’n i’n cefnogi hynny.”

Dyfodol Neil Taylor gyda Chymru

Un o brif ystyriaethau Neil Taylor, wrth gwrs, fyddai effaith symud i’r Bencampwriaeth ar ei yrfa ryngwladol, ac yntau’n rhan allweddol o garfan Cymru yn Ewro 2016 haf diwethaf.

Dywedodd Paul Clement: “Fe wnaeth e’n dda i Gymru yn yr haf ac mae e am barhau â hynny.”

Bydd y trosglwyddiad hefyd yn golygu y bydd Neil Taylor yn ymuno â Chymro arall yn Aston Villa, sef capten y clwb, James Chester.

Ychwanegu Sylw

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.


Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.


Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.


Gofynwn yn garedig i bawb ddarllen canllawiau ‘Cyfrannu i elfennau rhyngweithiol Golwg360’ yn ofalus cyn gadael sylwadau ar y gwasanaeth.


Nodi Camddefnydd
Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.