Argymell cynnal Cwpan y Byd yn y gaeaf

 


Mae tasglu FIFA wedi argymell cynnal Cwpan y Byd Qatar 2022 ym mis Tachwedd a Rhagfyr er mwyn osgoi tymheredd uchel yn ystod yr haf.

Mewn cyfarfod yn Doha heddiw fe gadarnhaodd y tasglu mai dyna oedd yr opsiwn gorau, ac maen nhw hefyd yn awgrymu cwtogi ar hyd y twrnament.

Bydd pwyllgor gweithredol FIFA, yr awdurdodau pêl-droed, nawr yn pleidleisio ar y cynllun ym mis Mawrth i benderfynu’n derfynol.

Gwres llethol

Ers i Qatar gael ei dewis fel y wlad fyddai’n cynnal twrnament 2022 mae pryderon wedi bod ynglŷn â’r gwres llethol yn y wlad, sydd yn gyson dros 40 gradd Celsiws yn yr haf.

Ym mis Mehefin a Gorffennaf y mae Cwpan y Byd yn draddodiadol wedi cael ei chynnal erioed, ond mae’r tasglu wedi cytuno â nifer o arbenigwyr sydd wedi awgrymu na fydd hynny’n bosib yn Qatar er lles y chwaraewyr.

Fodd bynnag, mae clybiau mawr Ewrop wedi eu cythruddo gyda’r syniad o gynnal y twrnament yn y gaeaf, gan y bydd hyn yn tarfu ar eu tymhorau domestig nhw.

Dyna pam maen nhw wedi rhoi pwysau ar FIFA i leihau hyd y twrnament, sydd fel arfer yn parhau ychydig dros fis.

Does dim cynlluniau ar hyn o bryd i leihau nifer y timau fydd yn cystadlu o 32, na nifer y gemau lawr o 64, ond fe allai’r twrnament weld llai o ddyddiau gorffwys i dimau rhwng gemau.

Mynnodd ysgrifennydd cyffredinol FIFA Jerome Valcke nad oedd ganddynt lawer o ddewis, yn enwedig o gofio bod Gemau Olympaidd y Gaeaf yn cael eu cynnal ym mis Ionawr a Chwefror 2022.

“Mae un ateb i’w gael, Tachwedd-Rhagfyr,” meddai Jerome Valcke.

Herio’r penderfyniad?

Mae FIFA eisoes wedi cynnal ymchwiliad i gais Qatar a Rwsia, fydd yn cynnal Cwpan y Byd 2018, ar ôl awgrym o lwgrwobrwyo.

Yn ôl canfyddiadau’r adroddiad a gyhoeddodd FIFA roedd y ddwy wlad yn ddieuog o unrhyw gamymddwyn.

Ond gwrthododd FIFA ryddhau’r adroddiad yn llawn ac roedd y dyn fu’n gyfrifol am yr ymchwiliad, Michael Garcia, yn feirniadol iawn o’r ffordd yr oedd FIFA wedi dehongli ei adroddiad.

Doedd neb yn disgwyl i Qatar gael yr hawliau i gynnal Cwpan y Byd 2022 cyn y bleidlais gudd gan bwyllgor gweithredol FIFA, gyda gwledydd fel yr UDA, Siapan ac Awstralia ymysg y ceffylau blaen.

Mae Awstralia wedi awgrymu yn y gorffennol y gallan nhw ddwyn achos yn erbyn FIFA os yw Cwpan y Byd Qatar yn cael ei symud i’r gaeaf, gan fod y broses ymgeisio yn benodol yn dweud fod yn rhaid cynnal y gystadleuaeth yn yr haf.

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd