Morgannwg ar drothwy buddugoliaeth brin yng Nghaerdydd

Gallai tîm criced Morgannwg gipio buddugoliaeth brin yng Nghaerdydd ar drydydd diwrnod eu gêm Bencampwriaeth olaf yn erbyn Swydd Caerlŷr.

Mae ganddyn nhw fantais o 333 yn eu hail fatiad, wrth ddechrau’r diwrnod ar 106 am bedair, ar ôl penderfynu peidio â gorfodi’r gwrthwynebwyr i ganlyn ymlaen ar ôl adeiladu mantais batiad cyntaf o 227.

Dydi Morgannwg ddim wedi ennill gêm Bencampwriaeth ers gêm gynta’r tymor hwn, ac maen nhw heb fuddugoliaeth yn y gystadleuaeth hon yng Nghaerdydd ers tair blynedd, pan guron nhw eu gwrthwynebwyr presennol.

Erbyn i’r Cymry gau eu batiad heddiw, mae’n debygol y bydd gan y Saeson nod o fwy na 400 i ennill – a hynny ar ôl cael eu bowlio allan am 132 yn eu batiad cyntaf.

Batio llwyddiannus am unwaith

Roedd batiad cyntaf Morgannwg yn dirwyn i ben ar ddechrau’r ail ddiwrnod wrth i Timm van der Gugten a Kieran Bull adeiladu partneriaeth o 80 am y nawfed wiced, gan sicrhau pedwerydd pwynt batio i’r Cymry.

Tarodd yr Iseldirwr Timm van der Gugten ei ail hanner canred mewn tair gêm wrth orffen gyda 50 ar ei ben.

… a bowlio cywir

Wrth ddechrau eu batiad cyntaf, collodd y Saeson eu  batiwr agoriadol Sam Evans yn y belawd gyntaf un, pan gafodd ei fowlio gan gapten Morgannwg, Michael Hogan.

Collodd yr ymwelwyr eu capten Colin Ackermann ym mhelawd ola’r sesiwn gyntaf pan gafodd ei ddal gan y wicedwr Chris Cooke oddi ar fowlio Graham Wagg, gan orffen ar 48 am ddwy.

Cafodd cyn-fatiwr Morgannwg, Mark Cosgrove ei waredu yn yr un modd oddi ar belen gyntaf sesiwn y prynhawn.

Cafodd Harry Dearden ei ddal gan Timm van der Gugten oddi ar ei fowlio’i hun am 48, yr unig gyfraniad o bwys i’r ymwelwyr mewn batiad digon siomedig ar y cyfan.

Cwympodd un wiced ar ôl y llall wedyn, a Graham Wagg yn gorffen gyda thair wiced am 25 mewn deg pelawd – a phedair ohonyn nhw’n belawdau di-sgôr. Cipiodd Michael Hogan, Timm van der Gugten a Craig Meschede ddwy wiced yr un, a’r troellwr ifanc Kieran Bull gipiodd y llall.

Ail fatiad Morgannwg

Parhau wnaeth cyfnod siomedig Stephen Cook gyda Morgannwg, wrth i Tom Taylor daro’i goes o flaen y wiced am bump. Mae e wedi sgorio 120 rhediad yn unig mewn wyth batiad ar gyfartaledd o 15.

Ar ôl colli’r batiwr agoriadol o Dde Affrica, collodd Morgannwg dair wiced am un rhediad.

Tarodd Dieter Klein goes Nick Selman o flaen y wiced cyn i’r un bowliwr roi daliad i’r wicedwr Lewis Hall i waredu Jack Murphy.

Roedd Morgannwg yn yn 39 am bedair pan ergydiodd Kiran Carlson yn wyllt y tu allan i’r ffon agored i roi daliad arall i’r wicedwr oddi ar fowlio Gavin Griffiths.

Adeiladodd Chris Cooke a Jeremy Lawlor bartneriaeth ddi-guro o 67 wedyn am y bumed wiced, a Chris Cooke heb fod allan ar 41.