Joe Burns yn cymryd lle Shaun Marsh ym Morgannwg

Diweddarwyd  

Mae disgwyl i’r batiwr llaw dde o Awstralia, Joe Burns ymuno â Chlwb Criced Morgannwg am weddill y gystadleuaeth ugain pelawd, y Vitality Blast.

Daeth cadarnhad y bydd ei gydwladwr, Shaun Marsh allan am weddill y tymor ar ôl anafu ei ysgwydd, ac mae e wedi dychwelyd i’w famwlad am driniaeth.

Fe allai Joe Burns chwarae ei gêm gyntaf dros Forgannwg yn erbyn Gwlad yr Haf yng Nghaerdydd nos Wener, ac fe fydd e’n ymuno â’i gydwladwr Usman Khawaja yn y garfan.

Mae e wedi chwarae mewn 55 o gemau ugain pelawd dros ei wlad, yn ogystal â chwe gêm 50 pelawd a 14 gêm brawf.

Mae Morgannwg wedi ennill dwy gêm ac wedi colli un hyd yn hyn yn y gystadleuaeth ugain pelawd, ac mae ganddyn nhw 11 o gemau’n weddill.

Gyrfa Joe Burns

Morgannwg yw trydedd sir Joe Burns yn y gêm sirol yng Nghymru a Lloegr, yn dilyn cyfnodau gyda Swydd Gaerlŷr a Middlesex.

Yn ystod ei gyfnod gyda Swydd Gaerlŷr yn 2013 – yn eilydd i’r batiwr o India’r Gorllewin Ramnaresh Sarwan – sgoriodd e 71 mewn gêm ugain pelawd yn erbyn Morgannwg cyn anafu ei goes.

Sgoriodd e 81 heb fod allan yn erbyn Swydd Durham y tymor hwnnw.

Ac fe gymerodd e le ei gydwladwr Adam Voges yng ngharfan Middlesex yn 2015.

Roedd e eisoes wedi gwneud enw iddo fe ei hun gyda 140 yn ei gêm gyntaf yn y Sheffield Shield dros Queensland yn erbyn De Awstralia yn 2011.

Cafodd ei enwi’n Gricedwr Ifanc Don Bradman y Flwyddyn yn 2013 cyn taro 114 i dîm ‘A’ Awstralia ychydig yn ddiweddarach.

Ymddangosodd e mewn gêm brawf am y tro cyntaf yn erbyn India yn 2014, a sgorio dau hanner canred yn yr ail brawf. Daeth ei ganred cyntaf  yr un flwyddyn yn erbyn Seland Newydd a chael ei enwi’n seren y gêm, cyn sgorio 128 yn erbyn India’r Gorllewin.

Yn 2017, sgoriodd e ganred dwbl dros Queensland yn erbyn De Awstralia yn y Sheffield Shield, a chael ei enwi yn Nhîm Sheffield Shield y Flwyddyn yn 2018.

Fis Mawrth eleni, cafodd ei alw i garfan brawf Awstralia yn erbyn De Affrica pan gafodd David Warner, Cameron Bancroft a Steve Smith eu gwahardd am ymyrryd â’r bêl.

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd