Clwb Criced Pontypridd i elwa o werthu darluniau o Don Bradman

Diweddarwyd am  

Llun parth cyhoeddus CC0 trwy Commons Wikimedia

Fe fydd dau ddarlun o un o fawrion y byd criced yn cael eu gwerthu mewn ocsiwn ddydd Sadwrn, a’r arian yn mynd i Glwb Criced Pontypridd.

Cafodd y darluniau o Syr Donald Bradman eu rhoi i gyn-gricedwr Morgannwg, y diweddar Bernard Hedges rai blynyddoedd yn ôl gan yr artist Douglas Davies. Roedd yntau’n gapten ar Glwb Criced Y Bont-faen ac roedd e wedi magu cyfeillgarwch â’r cricedwr mwyaf yn hanes Awstralia.

A nawr, mae Stephen Hedges, mab Bernard, yn gwerthu’r eitemau mewn ocsiwn yng Nghaerlŷr. Ei obaith yw y bydd yr elw’n gallu helpu Clwb Criced Pontypridd, clwb tref enedigol ei dad.

Y darluniau

Cafodd y darlun cyntaf ei greu â phensel ar gyfer pen-blwydd Syr Donald Bradman yn 80 oed. 16 Ionawr, 1986 yw’r dyddiad ar y darlun, ac fe gafodd ei lofnodi gan y cricedwr ei hun.

Yn ôl yr arwerthwr Tim Davidson o Nottingham, mae e mewn cyflwr da iawn, ac mae disgwyl iddo gael ei werthu am £30-£50.

Pris tebyg sydd yn cael ei gynnig ar gyfer yr ail ddarlun, a gafodd ei greu yn 1984 ac yn nodi i’r darlun gael ei lofnodi ar ôl i Syr Donald Bradman gael strôc. Mae hwn mewn cyflwr da iawn hefyd, yn ôl yr arwerthwr.

Yr ocsiwn

Mae’r ddau ddarlun ymhlith 383 o eitemau sy’n cael eu gwerthu yn ocsiwn cymdeithas y Cricket Memorabilia Society yng nghae Grace Road yng Nghaerlŷr ddydd Sadwrn. Ymhlith yr eitemau eraill mae ffotograffau a llyfrau sydd wedi’u llofnodi.

Wrth drafod sut y cafodd Bernard Hedges y darluniau gan Douglas Davies, dywedodd Stephen Hedges wrth golwg360: “Roedd e’n arfer ymweld â Dad yn y tŷ yn Newton [yn Abertawe[ ac fe wnaeth e jyst roi’r ddau ddarlun hyn iddo fe.

“Fe wnaeth Dad eu rhoi nhw i fi, ac maen nhw wedi bod gyda fi yn y tŷ ers hynny, a dw i erioed wedi gwneud unrhyw beth gyda nhw.”

Ac fel yr eglura, doedd e ddim yn bwriadu eu cadw nhw ac felly’n dymuno iddyn nhw gael eu gwerthu fel y byddai Clwb Criced Pontypridd yn gallu elwa o’r arian.

“Ro’n i bob amser yn meddwl mai un o’r pethau mwya’ caredig y gallwn i ei wneud oedd defnyddio’r arian a fyddai’n cael ei godi o’r gwerthiant ar gyfer [Clwb Criced] Pontypridd. Dyna fy mwriad.

“Fyddan nhw ddim yn torri’r banc. Mae gan bob un bris cadw o £30-£50 felly dyna lle maen nhw’n gobeithio dechrau’r ocsiwn. Bydda i’n mynd gan fod gyda fi gryn ddiddordeb i weld sut mae’n gweithio ac i weld yr eitemau drosof fi fy hun.

“Gobeithio y bydd yn codi rywfaint, a bydda i fwy na thebyg yn ychwanegu arian ato a’i gyflwyno i’r clwb am beth bynnag maen nhw’n gallu defnyddio’r arian ar ei gyfer.”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd