Alan Jones yw Llywydd newydd Orielwyr San Helen

 
Llun o Alan Jones yn batio

Alan Jones yn batio tros Forgannwg

Llun: Clwb Criced Morgannwg

Un o arwyr hanesyddol Clwb Criced Morgannwg, Alan Jones, yw Llywydd newydd Orielwyr San Helen, y clwb cefnogwyr sy’n sicrhau dyfodol criced sirol yn y De-orllewin.

Mae cyn-gapten a phrif hyfforddwr y sir, sy’n Gymro Cymraeg o Abertawe, yn olynu un arall o feibion yr ardal, y diweddar Don Shepherd a fu farw y llynedd.

Dywedodd cadeirydd a sylfaenydd yr Orielwyr, John Williams mai Alan Jones oedd y dewis “naturiol” i fod yn Llywydd, ac yntau’n allweddol yn y digwyddiadau a arweiniodd at ei sefydlu yn 1972.

Fe hefyd yw Llywydd y sir.

‘Gwerthfawrogi’

Fe fu John Williams yn cofio am sefydlu’r Orielwyr adeg gêm yn erbyn Swydd Northamptom yn San Helen Abertawe.

Bryd hynny, roedd y ddau agorwr, Alan Jones a Roy Fredericks wedi sgorio partneriaeth agoriadol o 330 a’r sgôr anferth wedi ennyn ymateb cyflym.

“Roedd aelodau oedd yn eistedd ar yr oriel wedi gofyn i ysgrifennydd Morgannwg, Wilf Wooller am ganiatâd i gasglu arian mewn bwced o amgylch y cae i ddangos ein gwerthfawrogiad,” meddai John Williams.

Sefydlwyd yr Orielwyr yn fuan wedyn, ac mae wedi codi dros £375,000 erbyn hyn i sicrhau bod criced dosbarth cyntaf yn cael aros yng ‘nghartref ysbrydol’ Morgannwg. Mae’r clwb hefyd yn trefnu teithiau i gemau oddi cartref y sir ledled Lloegr ers 42 o flynyddoedd.

‘Stori wych’

“Mae’n stori wych,” meddai John Williams.“Sgoriodd Alan dros 34,000 o rediadau dosbarth cyntaf ar leiniau oedd heb eu gorchuddio, a heb wisgo helmed!”

Dywedodd ei fod e “ar ben ei ddigon” fod Alan Jones wedi derbyn y gwahoddiad i fod yn Llywydd.

“Mae e wedi gwneud popeth dros y sir ac mae’n un o’r batwyr gorau y mae Morgannwg wedi eu cynhyrchu.”

‘Dilynwyr gwych’

 Wrth ymateb i’r cyhoeddiad, dywedodd Alan Jones: “Rwy wrth fy modd eu bod nhw wedi gofyn i fi fod yn Llywydd.

“Dyw hi ddim yn hawdd i’r chwaraewyr chwarae oddi cartref ac mae gweld yr Orielwyr yno’n eu cefnogi nhw’n hwb i’r chwaraewyr. Mae’r gwaith nhw’n ei wneud ar gyfer criced yn San Helen yn rhagorol.

“Mae cael bod yn Llywydd Morgannwg a’r Orielwyr yn arbennig iawn.”

 

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd