Tîm criced i Gymru: “Diffyg uchelgais” Llywodraeth Cymru yn “siom”

Diweddarwyd am  


Jonathan Edwards wedi'i siomi gan agwedd Weinidog yr Economi, Ken Skates
Mae llythyr gan Weinidog yr Economi, Ken Skates yn nodi na fydd Llywodraeth Cymru’n mynd â mater tîm criced i Gymru ymhellach yn “dangos diffyg uchelgais”, yn ôl Aelod Seneddol Plaid Cymru, Jonathan Edwards.

Mae’r Aelod Seneddol tros Ddwyrain Caerfyrddin a Dinefwr yn un o’r lleisiau amlycaf yn yr ymgyrch.

Yn ei lythyr, dywedodd Ken Skates mai “penderfyniad i’r awdurdodau criced ac nid i Lywodraeth Cymru” fyddai a ddylai tîm criced Cymru gael ei sefydlu.

Mae Clwb Criced Morgannwg a chorff Criced Cymru’n gwrthwynebu’r syniad, gan ddadlau ei fod yn peryglu dyfodol Morgannwg fel un o ddeunaw sir y drefn Seisnig, sydd o dan reolaeth Bwrdd Criced Cymru a Lloegr.

Cymru, ar hyn o bryd, yw’r unig un o wledydd Prydain sydd heb dîm criced cenedlaethol. Mae gan Loegr ac Iwerddon dimau prawf llawn, tra bod gan yr Alban statws tîm undydd.

Cefnogaeth

Ddechrau’r haf, fe ddywedodd Prif Weinidog Cymru, Carwyn Jones wrth ymateb i gwestiwn yn y Senedd ei fod yn cefnogi sefydlu tîm undydd.

Ond roedd hynny, meddai, yn ddibynnol ar sicrwydd na fyddai’n peryglu statws Morgannwg a’u gallu i ddenu gemau rhyngwladol Lloegr i Gaerdydd.

Daeth cadarnhad ddoe y byddai Stadiwm y Swalec SSE yn cynnal gemau undydd yn erbyn Awstralia ac India y tymor nesaf.

Gwrthwynebiad

Ddechrau’r tymor hwn, dywedodd Criced Cymru wrth golwg360 nad oedd sefydlu tîm criced i Gymru’n “opsiwn”, yn eu barn nhw.

Yn ei lythyr yr wythnos hon, dywedodd Ken Skates fod “Criced Cymru wedi cynnig egluro’r sefyllfa yn fanylach i unrhyw aelod, yn bersonol, pe byddai ganddynt ddiddordeb”.

‘Dim newid yn safbwynt y Llywodraeth’

Wrth ymateb i’r llythyr, dywedodd Aelod Seneddol Plaid Cymru, Jonathan Edwards: “Mae llythyr y Gweinidog yn siomedig ac yn dangos diffyg uchelgais gan Lywodraeth Cymru.

“Does dim newid wedi bod yn safbwynt y llywodraeth er gwaethaf datganiad y Prif Weinidog ei fod e’n gefnogol.

“Bydd y llythyr yn siom i nifer o gefnogwyr criced yng Nghymru sy’n cefnogi gweld tîm cenedlaethol.

“Mae yna fodd i sicrhau tîm cenedlaethol Cymru heb beryglu statws Morgannwg neu Gerddi Sophia ar gyfer gemau prawf os oes gan Lywodraeth Cymru awyddus clir i drafod gyda Bwrdd Criced Lloegr a’r corff llywodraethu criced.”

Mae golwg360 wedi gofyn am ymateb gan Weinidog yr Economi, Ken Skates.

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd