Geraint Thomas “yn poeni dim” am drydydd gwrthdrawiad yn Ffrainc
Dyw’r Cymro Geraint Thomas ddim yn poeni yn dilyn ei drydydd gwrthdrawiad yn ystod ras feics Tour de France eleni.
Mae’n dal yn yr ail safle ar y cyfan, wrth iddo baratoi ar gyfer diweddglo’r ras dros y dyddiau nesaf.
Fe ddaeth oddi ar ei feic ar ôl 47km o’r unfed cymal ar bymtheg, a ddaeth i ben ar ôl 177km yn Nimes, ond fe lwyddodd i aros yn y peloton wrth i Caleb Ewan gipio buddugoliaeth yn y gwres.
“Fe wnes i dynnu hen grachen, felly roedd y croen newydd yn gwaedu,” meddai Geraint Thomas, a ddaeth oddi ar ei feic yn y cymal cyntaf a’r wythfed.
“Roedd gyda fi un llaw yn unig ar y bariau, ac fe wnaeth y gêrs neidio a mynd yn sownd, ac fe ges i fy nhaflu oddi ar fy meic wrth droi cornel. Ro’n i’n gwybod nad oedd hi’n ras, felly wnes i ddychwelyd i’r grŵp, ond mae’n rhwystredig.
“Roedd yn dipyn o beth brawychus.”
Y sefyllfa ar hyn o bryd
Bellach, mae bwlch o 95 eiliad rhwng y Cymro a’r Ffrancwr Julian Alaphilippe, sy’n arwain y ras.
Ond mae pedwar cystadleuydd o fewn 39 eiliad y tu ôl i’r Cymro.
Un cystadleuydd sydd allan o’r ras erbyn hyn yw Jakob Fuglsang, yn dilyn gwrthdrawiad yn ystod y 30km olaf, ac mae e bellach yn y nawfed safle ar y cyfan.
Yr Alpau fydd cyrchfan nesa’r cystadleuwyr, ac fe allai’r gwres llethol fod yn dipyn o her iddyn nhw.
Y disgwyl yw y gallen nhw orfod rasio mewn tymheredd o 33 gradd selsiws, ond fe fydd yn gostwng rywfaint wrth iddyn nhw gyrraedd mynyddoedd yr Alpau.
