Gŵr o Geredigion yn gwneud ei farc fel Dyn Haearn

 
Gareth Hodgson (pedwerydd o'r chwith) ar y podiwm yn Ninbych-y-Pysgod.

Gareth Hodgson (pedwerydd o’r chwith) ar y podiwm yn Ninbych-y-Pysgod.

Llun oddi ar ei gyfrif Facebook.

Mae lle i gredu mae gŵr o Geredigion yw’r Cymro cyflymaf erioed i gwblhau cystadleuaeth Dyn Haearn Cymru.

Fe gafodd y gystadleuaeth ei chynnal yn Ninbych-y-Pysgod dros y Sul, lle bu’n rhaid i gystadleuwyr gwblhau cwrs a oedd yn cynnwys nofio dros bellter o 2.4 milltir, seiclo 111 milltir a rhedeg marathon cyfan (26.2 milltir).

Dyma’r trydydd tro i Gareth Hodgson o Felin-fach gwblhau’r cwrs yn Sir Benfro, ac eleni oedd y tro cynta’ iddo ers dwy flynedd.

Fe’i cwblhaodd mewn naw awr, 43 munud a 21 eiliad, gan ddod yn gyntaf yn y categori i ddynion 30-34 oed, ac 11eg safle yn y gystadleuaeth gyfan – y Cymro cyflymaf am eleni ac, o bosib, erioed.

“Dyw’r corff ddim yn rhy ffôl [erbyn hyn],” meddai wrth golwg360. “Dw i’n cerdded bach yn od, ond dw i mewn un pishyn a does dim byd mas o’i le, rili.

“Roedd y cwrs tamed bach yn galed – byth yn flatno mas… ond roedd y tywydd yn ddigon deche i fod yn onest.”

Cefnogaeth

Mae’r gŵr 31 oed wedi bod yn cystadlu’n gyson mewn cystadlaethau athletaidd ers rhyw bedair blynedd, a’r llynedd fe gystadlodd yng nghystadleuaeth Dyn Haearn y Byd yn Hawaii.

Fe ddaeth hefyd yn agos at ennill y Dyn Haearn yn Nottingham ym mis Gorffennaf, gan gwblhau’r cwrs mewn llai na naw awr a sicrhau’r ail safle.

Ond mae’n dweud y bydd y gystadleuaeth yn Ninbych-y-pysgod yn aros yn hir yn y cof iddo, ar ôl i’r gefnogaeth a dderbyniodd yno ei gadw i fynd trwy gydol y dydd.

“Roedd y gefnogaeth rownd y cwrs, sa’ i byth wedi cael cymorth fel’na o’r blaen,” meddai. “Roedd hi mor fishi ʾna. Gyda phob cornel ro’n i’n dod rownd, roedd jyst rhywun ʾna ro’n i’n ei nabod.

“Jyst fel o’n i’n meddwl am arafu, roedd rhywun yn gweiddi, ac ro’n i’n codi yn ôl lan ʾto. Fel’na oedd hi trwy’r dydd, felly ro’n i’n falch iawn.”

Troi’n broffesiynol?

Yn ystod y tymor cystadlu eleni, a wnaeth ddechrau ym mis Ebrill i Gareth Hodgson, mae wedi cwblhau dwy gystadleuaeth lawn o’r Dyn Haearn.

Mae hefyd yn awyddus i gwblhau pump o gystadlaethau Hanner Dyn Haearn, cyn y bydd ei dymor yn dod i ben ddiwedd mis Hydref.

Y nod hirdymor iddo yw troi’n broffesiynol, ac mae’n gobeithio gwneud hynny o fewn y ddwy flynedd nesa’, meddai.

“Mae tipyn o baratoi i aller fynd i lawr yr hewl ʾna,” meddai. “Ond mae popeth dw i’n ei wneud nawr, dyna beth yw’r gôl.

“Dyw hi ddim yn secret rhagor, dyna be dw i’n gweithio amdano.”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd