RSS

Golwg360

MwyCau 

Bara Caws yn dathlu’r deugain yn Eisteddfod Genedlaethol Môn

Mai 16, 2017 18:04 Diweddarwyd Mai 17, 2017 08:03


Y Pentref Drama Llun: Golwg360
Mae cwmni Theatr Bara Caws wedi cyhoeddi y byddan nhw’n dathlu eu deugain mlynedd o fodolaeth eleni drwy berfformio ffars gan yr awdur Emlyn Gomer ar faes Eisteddfod Genedlaethol Ynys Môn.

Cafodd y cwmni ei sefydlu yn wreiddiol yn Eisteddfod 1976 gan berfformio am y tro cyntaf y flwyddyn ganlynol yn Wrecsam.

Fe fyddan nhw’n perfformio’r ffars Dim Byd Ynni ar Theatr y Maes rhwng nos Sul a nos Fercher ddechrau Awst.

Yr arlwy – ‘deinamig a chyffrous’

Mae hyn yn rhan o raglen lawnach gan yr Eisteddfod Genedlaethol lle bydd perfformiadau drwy gydol yr wythnos yn y Pentref Drama sy’n cynnwys Theatr y Maes, Caffi’r Theatrau, Cwt Drama a Sinemaes.

Yn rhan o hyn fe fydd sioe un-dyn gan y comedïwr Stifyn Parri, perfformiad o Romans gan Theatr Fach Llangefni, cyflwyniadau gan Mair Tomos Ifans a chyfle i weld drama fuddugol y Fedal Ddrama y llynedd – sef Estron gan Hefin Robinson.

Bydd sesiwn arbennig i ddathlu bywyd a gwaith yr actor JO Roberts o Ynys Môn fu farw y llynedd ac a gafodd ei ddisgrifio gan Gyfarwyddwr BBC Cymru, Rhodri Talfan Davies, fel “actor toreithiog fu’n serennu yn rhai o ddramâu cofiadwy a grymus ei gyfnod.”

Yn ogystal, mae prosiect Theatr Unnos Cwmni’r Frân Wen yn dychwelyd eleni lle bydd criw yn ysgrifennu, cynhyrchu a pherfformio theatr wreiddiol mewn ugain awr.

“Mae’r Pentref Drama wedi datblygu llawer dros y blynyddoedd diwethaf ac mae’n ardal ddeinamig a chyffrous, sy’n adlewyrchu’r diwydiant ffilm a theatr fywiog sydd gennym yng Nghymru,” meddai Sioned Edwards ar ran yr Eisteddfod Genedlaethol.

Ychwanegu Sylw

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.


Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.


Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.


Gofynwn yn garedig i bawb ddarllen canllawiau ‘Cyfrannu i elfennau rhyngweithiol Golwg360’ yn ofalus cyn gadael sylwadau ar y gwasanaeth.


Nodi Camddefnydd
Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.