Y Selar yn amddiffyn diffyg amrywiaeth enillwyr gwobrau

Diweddarwyd am  
Gwobrau'r Selar

Gwobrau’r Selar

Llun: Y Selar

Mae cylchgrawn Y Selar wedi amddiffyn y diffyg amrywiaeth ymhlith enillwyr y gwobrau dros y penwythnos, gan ddweud fod y bleidlais yn un gyhoeddus.

Roedd y nosweithiau’n llwyddiant ysgubol i’r trefnwyr, gyda channoedd o bobol yn y ddwy noson.

Ond mae rhai yn cwyno am ddiffyg merched ymhlith yr enillwyr, prinder grwpiau gwerin cyfoes ar y llwyfan a’r ffaith nad oes yna’r un enillydd ymhellach i’r de na Dolgellau.

Doedd y Welsh Whisperer ddim yn y noson wobrwyo gan ei fod yn canu yn Y Bala, ond fe fu yntau hefyd yn holi am y system o ddewis enillwyr.

Aeth rhai mor bell â chwestiynu holl bwrpas gwobrwyo cerddorion, wrth i Ceri Rhys Matthews ddweud nad yw’n deall y cyswllt rhwng “gwobr a chelfyddyd”.

Amddiffynnodd Y Selar eu gwobrau ar Trydar gan esbonio fod y bleidlais derfynol yn un gyhoeddus ac y bu 1,500 o bleidleisiau. Aeth y trefnwyr yn eu blaenau i ddweud nad ydynt yn “cael ceiniog o arian cyhoeddus gyda llaw, rwbath rydan ni’n falch iawn ohono.”

Sicrhau amrywiaeth “yn her”

Un sy’n amddiffyn Y Selar yw Llio Heledd, un o drefnwyr gigs Tyrfe Tawe yn Abertawe, er ei bod yn dweud bod sicrhau “amrywiaeth yn bwysig”.

“Roeddwn i yn noson Selar nos Sadwrn ac roedd hi’n hollol wych,” meddai wrth golwg360.

“Mae’n biti fod unrhyw un yn gweld bai. Tydi trefnu nosweithiau, yn enwedig rhai mawr fel yna, ddim yn hawdd”.

Mae’r criw bach o drefnwyr newydd gyhoeddi rhestr gigs acwstig y flwyddyn, gyda 40% ohonyn nhw’n ferched, a’r artistiaid yn dod o bron bob cwr o Gymru.

Denodd y trefnwyr sylw y llynedd drwy gyhoeddi blwyddyn o gigs gan artistiaid benywaidd yn unig ar nos Wener olaf bob mis, gyda rhai yn cwestiynu ai “stynt” oedd hynny.

“O’r mis yma tan Fehefin, mae Lowri Evans, Elin Haf, Sioned Webb, Mair Tomos Ifans a’r grŵp gwerin o ferched, Beca gyda ni,” meddai Llio Heledd.

“Er mwyn cael barn mynychwyr, rydan ni’n eu holi yn ystod y gigs ac yn gofyn pwy fydden nhw’n hoffi eu gweld yn y nosweithiau acwstig.

“Rydan ni, fel gwirfoddolwyr yn trio creu awyrgylch lolfa acwstig lle mae grwpiau roc, hyd yn oed, yn cael gwrandawiad.”

Mae’r lein-yp eleni yn cynnwys y parti noson lawen Bois Y Frenni a’r consuriwr Paul Eds, gan sicrhau nosweithiau amrywiol drwy gydol y flwyddyn.

“Rydyn ni wedi trio cael grwpiau roc, cantorion acwstig, grwpiau gwerin, ac ati. Ond tydi hynny ddim yn hawdd a’i gadw yn ddiddorol bob mis yn her.”

Anodd denu cynulleidfa

Y gwahaniaeth, efallai, rhwng Nosweithiau’r Selar a gigs bach fel Tyrfe Tawe yn Abertawe, meddai, yw fod y gynulleidfa yn anoddach i’w denu.

“Mae’n nosweithiau ni am ddim ac mae’n bwysig cael pob math o beth ymlaen i drio cael pobl drwy’r drws.

“Mae unigolion lleol yn gwneud cyfraniadau i dalu am ein gigs ni, felly mae’n bwysig eu bod yn llwyddo.

“Ac rydan ni’n lwcus fod miloedd yn gwylio rhai o’n fideos ni ar gyfrif trydar Tyrfe Tawe, @cyrfe.”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Gwobrau BAFTA Cymru 2018