Teyrngedau i’r cerddor, Gareth ‘Chef’ Williams

Diweddarwyd am  

Gareth ‘Chef’ Williams

Llun: Cyfrif Facebook JanMal Williams

Mae teyrngedau’n cael eu rhoi i rapiwr a cherddor o Gaerfyrddin a fu farw ddydd Llun (Mawrth 19) yn ddim ond 39 oed.

Roedd Gareth ‘Chef’ Williams yn bennaf adnabyddus am fod yn aelod o’r grŵp hip hop Tystion yn yr 1990au, ac am ei gyfraniad i’r Sîn Roc Gymraeg yn y cyfnod hwnnw.

Bu farw yn dilyn brwydr degawd o hyd ag alcoholiaeth.

Fe fydd ei angladd yn Arberth ddydd Mercher nesaf (Mawrth 28), ac mewn datganiad ar wefan Facebook, mae’i deulu wedi dweud bydd y gwasanaeth dyneiddiol yn gyfle i “ddathlu” ei fywyd.

“Annwyl y diawl”

Yn ôl y gantores Mared Lenny o Gaerfyrddin – sy’n perfformio dan yr enw Swci Boscawen – roedd Gareth Williams yn “foi cŵl” ac yn “annwyl y diawl” gyda  “lot o sbort a lot o charm”.

Ond, â hithau’n gyfaill agos iddo bu’n perfformio ag ef am gyfnod, mae Mared Lenny yn nodi nad oedd y farwolaeth yn sioc iddi hi.

“I’r rhai oedd yn agos i Chef doedd e ddim yn sioc,” meddai wrth golwg360. “Achos, yn anffodus, dyna oedd natur ei salwch.

“Yn anffodus mae’n rhywbeth sydd wedi bod yn hir-ddisgwyledig. Mae ei farwolaeth yn bach o wastraff ac yn drueni y diawl.”

“Calon y parti”

Bu Aled Thomas yn byw ar yr un stryd â Gareth Williams am gyfnod – ym Mharc y Delyn, Caerfyrddin – ac mae’n cofio jamio cerddoriaeth gydag ef.

Doedd gan ‘Chef’ “ddim byd cas i ddweud am neb”, meddai, ac mae’n nodi mai ef oed “calon y parti” bob amser.

“Roedd e’n byw pob dydd fel yr un olaf,” meddai Aled Thomas wrth golwg360. “Doedd e ddim yn rhy serious am bethau – ddim yn poeni am consequences! Felna oedd e.”

Wrth son am frwydr ei gyfaill yn erbyn alcoholiaeth, mae’n cofio’r tro diwethaf iddyn nhw gwrdd.

“Es i i weld e bore dydd Sadwrn yn nhŷ ei rhieni yn Sanclêr, a doedd dim lot o siâp gyda fe’r adeg yna,” meddai.

“Fi’n credu o’n i’n gwybod, ac roedd e’n gwybod hefyd, taw dyna fyddai’r tro ola’ i ni weld ein gilydd. Oedd e’n amser emosiynol iawn.”

“Bachan rili ffein”

Roedd Steffan Cravos – Sleifar i rai – yn gyd-aelod o fand y Tystion gyda Gareth ‘Chef’ Williams, ac mae e’n cofio cwrdd am y tro cyntaf wrth ysmygu y tu ôl i sied feiciau’r ysgol yng Nghaerfyrddin.

Yn dilyn y “cysylltiad cyntaf” yma, mae Steffan Cravos yn dweud i’r ddau ohonyn nhw “fondio” tros gasét  ‘Jump Around’ gan y grŵp hip hop House of Pain, cyn dod i dreulio “lot o amser” â’i gilydd yn creu a pherfformio cerddoriaeth.

“Fe gawson ni lot o laughs a lot o hwyl ar y ffordd, ac fe fydda’ i’n cofio amdano fe wastad yn chwerthin â gwen fawr.

“Mae’n drist iawn,” meddai wedyn am farwolaeth ‘Chef’. “Roedd e’n fachan rili ffein. Un o’r bobol neisaf i fi gael y pleser o’u nabod a gweithio gyda nhw.”

Â’r grŵp yn mynd i’r afael ag agweddau “difrifol, gwleidyddol” mae Steffan Cravos yn canmol ei gyd-rapiwr am ddod â “balans” i’r Tystion.

“Roedd e’n dda i gael Chef yn rhan o’r peth, achos oedd e’n dod â’r ochr mwy ysgafn – mwy o hiwmor falle.”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Gwobrau BAFTA Cymru 2018