Prosiect cerddorol ar y cyd rhwng Carwyn Ellis o’r band Colorama a dwy chwaer a brawd y triawd Plu – Marged, Elan a Gwilym Rhys – sydd wedi cipio gwobr Albym Cymraeg y Flwyddyn eleni.
Fe wnaethon nhw gyhoeddi’r albym Bendith sydd â chaneuon wedi eu hysbrydoli gan Sir Gaerfyrddin, ardal sy’n agos iawn at galon Carwyn Ellis a arferai fynd yno ar wyliau at ei deulu.
Y beirniaid eleni oedd Heledd Watkins, Llyr Evans, Huw Roberts, Ywain Myfyr, Katie Hall, Owain Schiavone, John Hywel Morris, Gwyneth Glyn ac Ellen Hall.
Roedd y rhestr fer ar gyfer y wobr eleni yn cynnwys:
- Band Pres Llareggub – Kurn
- Bendith
- Calan – Solomon
- Castles – Fforesteering
- Gwilym Bowen Rhys – O Groth y Ddaear
- Meinir Gwilym – Llwybrau
- Mr Huw – Gwna dy Feddwl i Lawr
- Ryland Teifi – Man Rhydd
- The Gentle Good – Ruins / Adfeilion
- Yws Gwynedd – Anrheoli
Bendith yn croesi ffiniau
“Roedd gennym restr fer hynod eclectig eleni, gyda phob math o genres cerddorol yn cael eu cynrychioli,” meddai Guto Brychan, un o drefnwyr y gystadleuaeth.
“A braf oedd cael cyfle i drafod yr albymau gyda phanel mor eang, sydd i gyd yn arbenigwyr yn eu meysydd.
“Roedd yn amlwg o’r drafodaeth bod albwm Bendith wedi llwyddo i groesi ffiniau genres ac apelio at gynulleidfa eang iawn, a braf yw gweld hynny. Roedd y panel yn teimlo bod hwn yn gyfanwaith hyfryd yn dangos cerddoriaeth Gymraeg a Chymreig ar ei orau. Braf felly yw gallu rhoi’r wobr i Bendith eleni.”
