Enillydd y ‘dwbwl’ yn dal mewn “bach o sioc” ar ôl Rhyng-gol 2018

 

Osian Owen

Llun oddi ar ei dudalen Facebook

Mae myfyriwr o Brifysgol Bangor “yn dal mewn bach o sioc” wedi iddo ennill y Gadair a’r Goron yn yr Eisteddfod Rhyng-gol dros y penwythnos.

“Dw i’n knakered, mae’n amlwg, ond dw i’n dal mewn bach o sioc,” meddai Osian Owen, sy’n wreiddiol o’r Felinheli, wrth golwg360.

“Ond mae’r gefnogaeth dw i wedi’i chael yn wych, mae pawb wedi bod yn gyfeillgar iawn.”

Fe gynhaliwyd yr eisteddfod ar gampws Prifysgol Cymru: Y Drindod Dewi Sant yn Llanbedr Pont Steffan eleni.

Y Gadair a’r Goron

Roedd y Gadair yn cael ei rhoi am gerdd heb fod dros 100 llinell ar y testun ‘Gweld’, a’r Goron am ddarn o ryddiaith ar y testun ‘Disgwyl’.

Roedd y gerdd fuddugol, a oedd yn gerdd rydd gydag ambell drawiad cynganeddol, yn trafod datblygiad carwriaeth dau, tra bo’r darn ar gyfer y Goron wedi’i ysgogi gan y gyfrol Prydeindod gan yr athronydd JR Jones, ac yn trafod hunaniaeth y Cymry.

Yn ôl Osian Owen, er bod cyfansoddi’r gerdd wedi bod yn “eithaf rhwydd”, fe gafodd dipyn mwy o drafferth i ysgrifennu’r darn rhyddiaith.

“Mi ro’n i wedi sgwennu’r Gadair dros gyfnod o ychydig wythnosau, felly mi ro’n i wedi gweld hwnna’n eithaf rhwydd,” meddai.

“Ond o ran y Goron… bu raid i fy ffrindiau fy nghloi yn fy stafell a’m gorfodi i sgwennu yn y dyddia ola’ yn arwain at y dyddiad cau. Mi aeth pethau ychydig yn ben-set ar gyfer y Goron.”

“Rhoi hyder”

Mae Osian Owen wedi bod yn llenydda ers rhai blynyddoedd, gan ennill ambell gystadlaeth mewn eisteddfodau lleol, ynghyd â mynd i ddosbarthiadau cynganeddu Rhys Iorwerth yn Galeri, Caernarfon.

Mae’n dweud bod y llwyddiant diweddaraf hwn wedi “rhoi hyder” iddo i ddal ati, yn enwedig ar ôl derbyn clod gan feirniad y ddwy gystadleuaeth, Tudur Dylan Jones.

“Mae’n rhoi hyder pan ydych chi’n cael beirniad fel yna yn rhoi’r Gadair a’r Goron i chi; mae’n rhoi hyder i fi fynd ymlaen i drio pethau eraill.”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Gwobrau BAFTA Cymru 2018