RSS

Golwg360

MwyCau 

CLIP SAIN: Blwyddyn cau llyfrgelloedd Gwynedd – “cywilyddus”

Rhagfyr 30, 2016 09:00 Diweddarwyd Rhagfyr 31, 2016 08:24


Wedi misoedd o “frwydro i’r pen” gan ymgyrchwyr, fe ddaeth penderfyniad Cyngor Gwynedd ym mis Medi eleni y bydd yn cau pedair llyfrgell yn y sir.

Er mwyn arbed tua £170,000 y flwyddyn, bydd llyfrgell Harlech, Penrhyndeudraeth, Llanberis a Deiniolen yn cau.

Yn ôl Idris Thomas o Ddeiniolen,  cyn-reithor â’r Eglwys yng Nghymru, mae’r penderfyniad yn “gywilyddus” wrth i Gyngor Gwynedd “ddwyn o’r dyfodol i dalu am heddiw”.

“Dyna sydd wedi digwydd tra bod cau’r llyfrgelloedd yn bod oherwydd mae pwysigrwydd darllen yn bwysig, mae hybu llythrennedd yn bwysig hefyd ac mae’r cyfan yn medru newid bywyd,” meddai wrth golwg360.

“Tristwch ydi’u cau nhw, ac mae’r cyfan yn effeithio ar ddyfodol pawb ohonom ni ond yn arbennig felly y genhedlaeth nesaf.

“Llyfrgelloedd yn fy marn i ydy un o’r lleoedd mwyaf hanfodol i’n cymdeithas wareiddiedig.”

“Ddim yn ddigon da”

Y llyfrgelloedd agosaf i drigolion ardal Dyffryn Peris bellach fydd yng Nghaernarfon a Bangor.

“… Be’ mae Cyngor Gwynedd yn ei gynnig rŵan ydy peiriant oeraidd mewn ystafell wag i bob pwrpas ac ry’ch chi’n archebu eich llyfrau fan yno, dydy hynny ddim yn ddigon da,” meddai Idris Thomas.

“Pan dw i’n mynd i siopau Cymraeg, pan dw i’n mynd i Waterstones, dw i eisiau gweld y llyfr yno a’i fyseddu o fel petai cyn ei brynu o.

“Mae’r cyfan yn drist, drist – lladd gwareiddiad i ni yn sicr. Mae yna lefydd eraill buasai Cyngor Gwynedd yn gallu torri yn hytrach na thorri rhywbeth cwbl arbennig,” ychwanegodd Idris Thomas.

“Rydan ni wedi brwydro i’r pen, rydan ni wedi cysylltu â phawb a phopeth, cawson ni ymgynghoriad iawn yma. Gofynnon ni iddyn nhw [Cyngor Gwynedd] ystyried o ddifrif… mae gwir angen llyfrgell yma i blant a phobol ifanc.

“Mi fydd o’n ddiwrnod trist i mi yn bersonol ac i lawer un arall pan fydd y drysau’n cau.”

Mae golwg360 wedi gofyn am ymateb gan Gyngor Gwynedd i sylwadau Idris Thomas.

Mae modd gwrando ar ei ddadleuon tros gadw llyfrgelloedd, yn y clip hwn:

Ychwanegu Sylw

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.


Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.


Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.


Gofynwn yn garedig i bawb ddarllen canllawiau ‘Cyfrannu i elfennau rhyngweithiol Golwg360’ yn ofalus cyn gadael sylwadau ar y gwasanaeth.


Nodi Camddefnydd
Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.