Teyrnged i delynor ar ben-blwydd arbennig

 
Osian Ellis yn chwarae'r delyn.

Osian Ellis

Llun gan Ceidiog PR.

Fe fydd bywyd a gwaith y telynor byd-enwog, Osian Ellis, yn cael ei ddathlu mewn gŵyl ryngwladol, wrth iddo agosáu at ei 90 oed.

Ddechrau mis Ebrill, fe fydd pedwaredd Gŵyl Delynau Ryngwladol Cymru yn cael ei chynnal yn y Galeri yng Nghaernarfon, ac mae disgwyl y bydd 100 o delynorion o wledydd megis Siapan, yr Unol Daleithiau a Rwsia yn bresennol.

Fe fydd yr ŵyl yn cychwyn gyda’r gyngerdd agoriadol, ‘OSIAN’, ar Ebrill 1 a fydd yn cynnwys cerdd newydd sy’n cael ei chyflwyno gan y Prifardd Mererid Hopwood, a pherfformiadau gan artistiaid offerynnol Cymraeg a fydd yn cyflwyno cerddoriaeth er clod i Dr Osian Ellis.

Yn ôl Elinor Bennet, cyfarwyddwraig yr Ŵyl, mae Dr Osian Ellis yn berson “eiconig” ac wedi gwneud “cyfraniad aruthrol”.

“Rydw i wrth fy modd ein bod ni’n dathlu pen-blwydd fy mentor, Osian Ellis, yn 90 oed a’n bod ni’n mwynhau dathlu ei waith a’r gerddoriaeth y mae wedi’i chreu yn ystod ei yrfa hir,” meddai.

Gyrfa

 Fe gafodd Osian Ellis ei eni yn Ffynnongroyw yn Sir y Fflint yn 1928, a bu’n chwarae’r delyn ers yn ifanc iawn.

Ar ôl ennill cystadleuaeth yn Eisteddfod Genedlaethol Bangor yn 1943, fe gafodd ysgoloriaeth yn yr Academi Gerdd Frenhinol yng Nghaerdydd, lle bu’n Athro’r Delyn rhwng 1959 a 1986.

Bu hefyd yn cydweithio â’r cyfansoddwr enwog, Benjamin Britten, ac fel aelod o Gerddorfa Wally Stott, bu’n chwarae ar y rhaglen radio, The Goon Show, a oedd yn cynnwys comedïwyr fel Spike Milligan, Harry Seacombe a Peter Sellers.

Cyngerdd fawreddog i gloi

 Bydd yr ŵyl yn cael ei chynnal yn y Galeri yng Nghaernarfon o ddydd Sul, Ebrill 1, i nos Wener, Ebrill 20, gyda chyngerdd a fydd yn cynnwys perfformiadau gan Bryn Terfel.

Cerddoriaeth

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd