RSS

Golwg360

MwyCau 

Owain Fôn Williams yn barod i werthu darlun Ewro 2016

Rhagfyr 14, 2016 14:45 Diweddarwyd am 14:47


Owain Fon Williams gyda'r darlun (Llun oddi ar ei dudalen Facebook)
Mae golwr Cymru, Owain Fôn Williams, wedi cofnodi hanes ymgyrch Cymru yn rowndiau terfynol Ewro 2016 yn Ffrainc ar gynfas.

Cafodd ei ysbrydoli i ddarlunio profiadau’r garfan gan ddau o’i gyd-chwaraewyr, Joe Ledley a Wayne Hennessey wrth i’r garfan ddathlu cyrraedd rownd gyn-derfynol y gystadleuaeth cyn colli yn erbyn Portiwgal, a aeth ymlaen i ennill y twrnament.

“Roedd haf 2016 yn un bythgofiadwy i ni yng Nghymru, un y gwnaf i fyth anghofio,” meddai Owan Fôn Williams ar ei wefan.

“Tra roeddwn allan yn Ffrainc, roedd Joe Ledley a Wayne Hennessey wedi bod yn fy mhen, i beintio llun o’r ddau – oherwydd y llwyddiant ges i byth y cyfle!

“Mae wedi cymryd dros bum mis i mi ei gwblhau a dwi yn mawr obeithio fy mod wedi llwyddo i wneud cyfiawnder â phawb fu’n chwarae eu rhan yn un o lwyddiannau mwyaf hanesyddol ein gwlad. Cymru am byth!”

Ychwanegodd fod y llwyddiant “yn llawn haeddu cael ei gofnodi ar gynfas”, a’i fod e wedi tynnu ar arwyddair Cymdeithas Bêl-droed Cymru wrth greu’r darlun.

“Dwi wedi ceisio cyfleu’r ymdeimlad o ‘gyda’n gilydd yn gryfach’, felly does neb yn ganolog yn y llun, doedd dim un unigolyn yn ganolog i’r llwyddiant. Y ‘wal goch’ yn gefndir, Ash [Ashley Williams], Gareth [Bale], Osian [Roberts], Chris [Coleman], Aaron [Ramsey], Joe [Ledley], Hal [Robson-Kanu]… gydag unigolion llai adnabyddus ond allweddol fel Mark Evans (sydd wedi’i godi) ac Ian Gwyn Hughes a gafodd y fraint o siarad y Gymraeg am y tro cyntaf erioed mewn cynhadledd twrnamaint pêl droed rhyngwladol.”

Mae printiadau o’r darlun ar gael ar wefan Owain Fôn Williams, a bydd y gwreiddiol yn cael ei gynnwys mewn arddangosfa ‘Arwyr Cymru’ yn y Llyfrgell Genedlaethol yn Aberystwyth ym mis Mawrth.

Bydd peth o’r elw o’r printiadau’n cael ei roi i ward plant Ysbyty Gwynedd.

Ychwanegu Sylw

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.


Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.


Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.


Gofynwn yn garedig i bawb ddarllen canllawiau ‘Cyfrannu i elfennau rhyngweithiol Golwg360’ yn ofalus cyn gadael sylwadau ar y gwasanaeth.


Nodi Camddefnydd
Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.