Gŵyl gofiadwy Hedd Wyn

Diweddarwyd  


Robin Gwyndaf sy’n edrych yn ôl ar Ŵ
yl Hedd Wyn a gynhaliwyd ym Mhenbedw…  

Gair o ddiolch diffuant yw hwn. Ar y Sadwrn a’r Sul, Medi 9-10, cynhaliwyd Gŵyl Hedd Wyn ar safle Ysgol Ysbytai Cilgwri, ym Mhenbedw (Birkenhead). Un o’r gwyliau mwyaf cofiadwy y bûm ynddynt erioed. A dyna farn y cannoedd oedd yno.

Cafwyd, er enghraifft, ddarlithoedd ardderchog gan Huw Edwards, Peredur Lynch  a D Ben Rees. Cyflwynwyd Cadair hardd yr Ŵyl yn rhodd gan Gymdeithas Hedd Wyn, Fflandrys. ‘Hedd Wyn’ oedd testun y gerdd, neu gyfres o gerddi.

Roedd naw wedi cystadlu, a thri yn deilwng iawn o’u cadeirio. Cyntaf: Martin Huws; Ail: Arwel Emlyn Jones; Trydydd: Hedd Bleddyn. Meistr y ddefod oedd Geraint Lloyd Owen, ein Harchdderwydd. Hyfryd hefyd oedd cael llu mawr o ymgeiswyr, 11-19 mlwydd oed, am y ddwy goron. Un  gystadleuaeth Gymraeg ac un Saesneg. Cerddi ar y testun ‘Yr Arwr’ / ‘Hero’.

Gwnaed cyfraniad gwerthfawr iawn i lwyddiant yr Ŵyl gan amryw gorau a pherfformwyr: Côr Meibion Orffiws Rhosllannerchrugog; Côr Ieuenctid Môn; Côr Meibion Bara Brith, Môn; Côr Rygbi Gogledd Cymru; Parti’r Betheliaid; Dylan Cernyw, y telynor; a’r cantorion: Alun Tan Lan  a Huw Ynyr.

Ar y Sul, yng nghapel Seion, cafwyd oedfa (homili gan Aled Lewis Evans), a chymanfa  ganu (arweinydd Alwyn Humphreys) y byddwn yn cofio amdanynt yn  hir.

Yn ystod yr Ŵyl dadorchuddiwyd cofeb i Hedd Wyn, ger y garreg ym Mharc  Penbedw, carreg sydd yno eisoes i gofio Eisteddfod 1917.

Rhannwyd a gwerthwyd medalau i gofio’r Ŵyl, a chyhoeddwyd rhaglen (85 tudalen): Canmlwyddiant y Gadair Ddu.  The Black Chair Centenary: 1917-2017.  Anogaf bawb a gollodd y cyfle i fynychu’r Ŵyl eleni ym Mhenbedw i sicrhau copi o’r cyhoeddiad gwerthfawr hwn.

Golygwyd y rhaglen a’i chyhoeddi gan y Parchedig Ddr D Ben Rees. Ef oedd prif ysgogydd Gŵyl Hedd Wyn. Llafuriodd yn ddiarbed, a mawr iawn yw dyled Cymru gyfan iddo. Diolch o galon hefyd am gymorth parod pob un o’i gydweithwyr.

Ôl nodyn. Cyfeiriwyd droeon yn ystod yr Ŵyl at Yr Ysgwrn, cartref Hedd Wyn, ac at gymwynas Gerald Williams. Daliaf innau ar y cyfle hwn i ddweud, ar ran yr holl ddarllenwyr, canmil diolch i Awdurdod Parc Cenedlaethol Eryri ac i bawb arall a fu â rhan mewn sicrhau y bydd yr Ysgwrn bellach yn parhau i fod yn ganolfan dreftadaeth gwir deilwng i Gymru.

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd