Dathlu cydraddoldeb ac amrywiaeth y Brydain fyd-eang

Diweddarwyd  
Harry a Meghan

Tywysog Harry a Meghan Markle ar achlysur cyhoeddi eu dyweddïad, Tachwedd 2017

Llun: Dominic Lipinski/PA Wire

Adroddiad o Windsor gan ohebydd brenhinol golwg360 …

Mae strydoedd Windsor yn llawn llawenydd a gorfoledd wrth i’r pâr brenhinol, Dug a Duges Sussex bellach, gael eu cyflwyno i’r torfeydd teyrngar a diolchgar.

Ar Sadwrn hyfryd o Fai mae’r dref frenhinol hon yn Swydd Berk yn edrych ar ei gorau, a’r golygfeydd fel petaent allan o stori dylwyth teg.

Yn ei gwisg ddifrycheulyd o sidan llaes at ei thraed a llathenni’n rhagor, mae’r Dduges wedi bod yn swyno’r miloedd gyda’r un rhwyddineb ag yr enillodd galon ei thywysog.

Mae miloedd fel petaent yn ymylu ar fod mewn perlewyg wrth iddynt ei chael hi’n anodd dygymod â mawredd yr achlysur.

Roedd y briodas yn llawer mwy nag uniad rhwng y priodfab a’r briodferch, gan ei bod hefyd yn tanlinellu undod cenedl gyfan ar drothwy trobwynt cyffrous yn ei hanes.

Roedd hefyd yn ddrych o gydraddoldeb ac amrywiaeth y Brydain fodern ar waith.

Drwy groesawu merch o dras cymysg ac annibynnol ei barn i’w phlith, mae’r Frenhiniaeth wedi profi ei fod yn sefydliad agored i bawb waeth beth fo’u hil na’u cefndir na’u crefydd na lliw eu croen (ac yn y blaen).

Mae’n tanlinellu’r ffaith fod gennym bellach Frenhiniaeth sydd â chydraddoldeb ac amrywiaeth yn rhan hanfodol ohoni.

Mae arwyddocâd dyfnach fyth i’r teyrngarwch a chwifio baneri heddiw o gofio bod Prydain ar fin adennill ei hannibyniaeth a chymryd ei lle yn dalsyth ymhlith cenhedloedd eraill y byd.

Lai na dwy flynedd ar ôl dangos bod ganddi hi’r hyder a’r asgwrn cefn i sefyll ar ei thraed ei hun, gwelwn fod ein gwlad yn fwy unedig nag erioed.

Mae gorfoledd yn y dorf yn brawf o ffydd ein pobl i geisio cymod â’n teg orffennol pan oedd gennym ymerodraeth yn rheoli’r tonnau ac yn ymestyn i bedwar ban byd.

Ac wrth i’n gwlad fod ar drothwy gwireddu ei huchelgais o hunan-lywodraeth lawn y tu allan i Ewrop, gwelwn fod dyfodol hir a disglair i’r Brydain fyd-eang newydd.

Blog

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd